„ნაციონალურ მოძრაობაში“ ძალიან საშიში ტენდენციაა, არის რაღაც სვეტების ჯგუფი, განათლებულების და არის ბნელი მასა, რომელიც მარტო არჩევნებზე უნდა გამოიყენო, – ამის შესახებ საქართველოს ყოფილმა პრეზიდენტმა მიხეილ სააკაშვილმა „რუსთავი 2“-ის ეთერში განაცხადა.
კითხვაზე, რატომ არ მოხდა „ნაციონალური მოძრაობის“ წევრების მხრიდან არჩევნების შედეგების გაპროტესტება, მიხეილ სააკაშვილმა განაცხადა, რომ პარტიის ლიდერებს ამაზე სხვადასხვა არგუმენტები ჰქონდათ.
”ამბობენ, რომ ვმარგინალიზდებით და ა.შ. ჩვენ მარგინალები ვიყავით 2003 წელს?! მე რეალურად ვიბრძოდი ქუჩაში. ჩვენ რეალურად ვიბრძოდით პენსიებისთვის, უკანონო მშენებლობების წინააღმდეგ და ა.შ. სულ რატომღაც იხსენებენ „გრეჩიხა“ და გაჩეჩილაძეს. უკაცრავად და შენი ისტორია არ უნდა დაგავიწყდეს. „გრეჩიხა“ მარგინალი იყო თავისი არსით და ბუნებით. „ნაციონალური მოძრაობა“ იბრძოდა ქუჩიდან და ჩვენ არასდროს ვიყავით მარგინალები, რადგან ვიცავდით ხალხის უფლებებს და ვლაპარაკობდით ხალხზე. ის, რომ „გრეჩიხას“ დავემსგავსებით, სისულელეა. მოდით, დავემსგავსოთ საკუთარ თავს, როგორებიც ვიყავით ხალხის პარტია, ამომრჩეველზე ორიენტირებული, უსამართლობის წინააღმდეგ მებრძოლი.
ჩვენს მომხრეებში არის ყველაზე პროგრესული, განათლებული ნაწილი საზოგადოების, მშრომელი ხალხი და ძალიან მოაზროვნე. ვიღაცისგან გეწყინება რაღაც, ვიღაცა გაგაკრიტიკებს, მაგრამ შენ ხალხს არ უნდა გაებუტო. ყველაზე უარესი, რაც შეიძლება ქნა, არის ის, რომ გაბრაზდე შენს ხალხზე. მიმაჩნია, რომ საქართველო საზოგადოების გაჯანსაღების პროცესი მიდის. ეს ამ არჩევნებმა აჩვენა“, – განაცხადა მიხეილ სააკაშვილმა.
