19 ნოემბერს ირაკლი ჩარკვიანი იგივე ,,მეფე” 55 წლის გახდებოდა. ადამიანი, რომელმაც ქართულ მუსიკალურ სამყაროში გადატრიალება მოახდინა და დღესაც არ კარგავს აქტუალურობას მისი შექმნილი მელოდიებით, 2006 წლის 24 თებერვალს გარდაიცვალა. მისი გარდაცვალების შემდეგ კი მისმა სიმღერებმა კიდევ უფრო პოპულარობა და სიცოცხლე შეიძინა.
„ადამიანი აქ არ მღერის იმას, რაზეც ფიქრობს. ეს არის ქართველის უბედურება. სახლში, ახლობლებში ლაპარაკობს, აგინებს ამ სოციალურ პრობლემებს, სცენაზე გამოდის და ასრულებს დებილი კომპოზიტორის დაწერილ „დათუნებსა“ და „ხათუნებს“…“ – ამბობდა ჩარკვიანი.
ირაკლი თავად წერდა ტექსტებს, ხოლო მისი საშემსრულებლო სტილი ინდივიდუალურობით ხასიათდებოდა.
,,დღეს ირაკლის დაბადების დღეა. მიხარია, რომ მის 55 წლისთავს ქალაქ-თბილისი მეფე-ს მონუმენტით ხვდება. 6 საათზე დედაენის ბაღში ოფიციალურად გაიხსნება როკო ირემაშვილისა და ვალო იმერლიშვილის ერთობლივი ნამუშევარი. მადლობა თბილისის მერიას პროექტის დაფინანსებისთვის და გმადლობ ირაკლი შენ, რადგან ყველაფრის მიუხედავად აგრძელებ პოზიტიური ზეგავლენის მოხდენას როგორც სოციუმზე, ასევე დიდწილად ჩემზე. გმადლობ შენი ნიჭიერებისთვის, შეუპოვრობისთვის და ზოგჯერ სასტიკი სიმართლით გაჯერებული ემოციური ფრაზებისთვის, გმადლობ შენი დაუვიწყარი მუსიკალური თემებისთვის, გმადლობ მეტაფორებისთვის, რომლებიც არიან დაუნდობელნი, როგორც ყოველი მართალი.ირაკლი, მოვიდა დრო!“-წერს სოციალურ ქსელში ირაკლი ჩარკვიანის მეუღლე, ქეთათო პოპიაშვილი.
ნატალია ჯალაღონია