„პრეზიდენტის ინსტიტუტს დიდ პატივს ვცემთ და შესაბამისად ურთიერთობაში ექსცესების არანაირი საფუძველი არ არსებობს. არ ვაპირებთ რაიმე გადაწყვეტილების მიღებას ერთპიროვნულად, მით უმეტეს პრეზიდენტის არჩევის წესთან დაკავშირებით კანონის ცვლილებას“. ამის შესახებ პარლამენტის ფრაქცია „ქართული ოცნების“ თავმჯდომარემ მამუკა მდინარაძემ „რუსთავი 2“–ზე, გადაცემა „შაბათის კურიერის“ ეთერში ისაუბრა.
„ოპონენტები ცდილობენ შექმნან სხვა რეალობა და ამ რეალობის შესახებ საათობით ილაპარაკონ. ჩვენს კონსტრუქციულ განწყობაზე ჩვენი ლიდერს პოზიციაც მიუთითებს. ყველას მოვუწოდებ არ ავყვეთ მათ რიტორიკას, ეს ადამიანები მუდმივად შეეცდებიან სესიები პოლემიკის, პოპულიზმის გამოხატულების რეჟიმში წარმართონ. ჩვენ ამ რიტორიკაში ბოლომდე ჩართვას არ ვაპირებთ. რამდენიმე კვირა მიმდინარეობდა ნეგატიური პიარი, თითქოს „ქართული ოცნება“ აანონსებდა პრეზიდენტის არჩევის ტიპის შეცვლას. ეს არავის უთქვამს არც ერთ ინტერვიუში. ეს იყო კონტექსტიდან ამოგლეჯილი ფრაზის ინტერპრეტაცია.
ამ კონსტიტუციას უკეთესს ვერაფერს დამართებ, თუ არ გააკეთილშობილებ. როდესაც ეგრედწოდებული საკონსტიტუციო რეფორმა იქნება და პრემიერის მიერ დააონსებული კომისია შეიქმნება, ვაპირებთ მრავალი საკითხი განვიხილოთ და ბალანსი იყოს უზრუნველყოფილი. ასეთ ვითარებაში დემოკრატიულ პრინციპების დაცვას სისტემები და ინსტიტუტები უზრუნველყოფენ, და არა პიროვნებები. ეს შესაძლებელია მხოლოდ საპარლამენტო ფორმატში, ცოტა კოლიზიური შეიძლება გახდეს პრეზიდენტის თანათავმჯდომარეობა. ამ კომისიაში პრეზიდენტის გარდა უნდა იყვნენ არასამთავრობო სექტორის წარმომადგენლები, სხვადასხვა დარგის ექსპერტები იმისათვის, რომ გადაწყვეტილება დაბალანსებულად, კონსენსუსით იქნას მიღებული. ამას უნდა დაეთანხმოს ვენეციის კომისიის დასკვნაც“.
მამუკა მდინარაძემ ტელეკომპანია „რუსთავი 2“–ის საქმეზეც ისაუბრა.
„ვეთანხმები საერთაშორისო მონიტორინგის პოზიციას, რომ ხელისუფლების გავლენის ქვეშ არც ერთი არხი, არც ერთი მედიასაშუალება არ უნდა მოექცეს. ეს საშიშია, თუმცა მსგავსი ფაქტი არ არსებობს. „რუსთავი 2“– მა ბევრი რამ შეძლო, კრიტიკასაც აქვს კეთილშობილური მიზნები. სასამართლო არის დამოუკიდებელი და ის მიიღებს გდაწყვეტილებას, რომელსაც უნდა დავემორჩილოთ. ჩვენი ხელისუფლების მთავარი მონაპოვარია, რომ ბიზნესზე, მედიაზე არანაირი ზეწოლა არ არსებობს“.
მანანა ღოღობერიძე