„ეს ოთხ პუნქტიანი გეგმა პრობლემას ვერანაირად ვერ წყვეტს. არ მინდა ამ ეტაპზე კრიტიკული ვიყო, საერთაშორისო სტანდარტით 100 დღე ვაცადოთ და მარტში დავთვალოთ წიწილები. ეს გეგმაზე მეტად არის სურვილების დეკლარაცია. ჩვენ სუსტი ეკონომიკა კი არ გვაქვს, უბრალოდ არ გვაქვს ეკონომიკა. ვართ მოხმარებელი ქვეყანა“. ამის შესახებ პოლიტიკის ექსპერტმა გია ხუხაშვილმა „რუსთავი 2“–ზე, გადაცემა „კურიერის“ ეთერში ისაუბრა.
„ჩვენს ქვეყანას მდორე განვითარება არ აწყობს, ეს უკუსვლაა. გვჭირდება ნახტომისებური გარღვევა და ამას სერიოზული რეფორმა სჭირდება. ჩვენ არ გვაქვს თვითკმარობის განცდა, ჩამოვყალიბდით მომხმარებელ ქვეყნად. გვჭირდება სისტემური, აქტიური მოქმედებები, ეკონომიკის რეალური სექტორის ჩამოყალიბება.
თუ ვაშენებთ დემოკრატიულ სახელმწიფოს და საერთოდ სახელმწიფოს თუ ვაშენებთ, პრინციპულია გადავდივართ თუ არა ინსტიტუციურ მართვაზე. ინსტიტუციური მმართველობა არის ერთ–ერთი ვეშაპი, რაზეც დგას სახელწმიფო. იღებს თუ არა პრემიერ–მინისტრი პასუხისმგებლობას ამ ადამაინებზე და პრობლემების შემთხვევაში ვის უნდა მივმართოთ. ამ გადაადგილეებით ეს ბუნდოვანება არა თუ არ გაქარწყლებულა, არამედ ყველაფერი ისევ ისე დარჩა. განცდა იმისა, რომ კვირიკაშვილია პირველი პირი, ძალაუფლების ცენტრი, ამ გადაადგილებებით ისევ ბუნდოვანი დარჩა. გაურკვეველია ვის უნდა ელაპარაკო, ვინ არის გადაწყვეტილების მიმღები ამ ქვეყანაში. კვირიკაშვილს ეს კითხვა რომ დაუსვა, შეიძლება დაიბნეს და ვერ გიპასუხოს. ეს ქმნის არაჯანსაღ ვითარებს. ვერ განვითარდა „ქართული ოცნება“ ისე, რომ ლიდერების გენერაცია მოეხდინა.
ამ გადაადგილებებთან პრეტენზია არ მაქვს, პოზიტიურადაც შემიძლია შევაფასო. თუნდაც დიმიტრი ქუმსიშვილი, მისი ბიოგრაფიიდან გამომდინარე უფრო ფინანსისტია, ვიდრე ეკონომისტი. რაც შეეხება გიორგი გახარიას დანიშვნას, ამ ადამიანმა ბოლო წლებში პოტენციურ ინვესტორებსა და სახელმწიფოს შორის საკმაოდ კარგი კომუნიკაციის უნარი აჩვენა. სწორედ ეს არის ეკონომიკის მინისტრის მთავარი ფუნქცია. სისხლიან 9 წელზე რიტორიკა, რომ ფარსია ალავიძის დანიშვნითაც გამოაშკარავდა. „ნაციონალუური მოძრაობის ერთ–ერთი სახელოვანი შემომწირველი „ქართული ოცნების“ მინისტრის რანგში წარმოაჩენს ფარსს“.
გია ხუხაშვილმა ვიქტორ დოლიძის მინისტრად დანიშვნაზე და „რუსთავი 2“–ის საქმეზეც ისაუბრა.
„ვიქტორ დოლიძის მინისტრად წარდგენას ვაფასებ ცუდად, პირდაპირ ვიტყვი, ბუნებაში ასეთი რამ არ ხდება. არ არის ის ისეთი შეუცვლელი კადრი, რომ ვერავინ ეპოვათ. ცუდად მოიქცა „თავისუფალი დემოკრატების“ ელიტის დიდი ნაწილი. თურმე შეიძლება ყველას და ყველაფერს ხაზი გადაუსვა. ის საუბრობდა ამ ხელისუფლების პირობებში პოლიტიკურ პატიმრებზე, ის ადამიანები დღეს ციხეში სხედან და ეს მინისტრი ხდება.
„რუსთავი 2“–ის საქმე არის ერთ–ერთი მთავარი ტესტი, საით მიდის ეს ქვეყანა. „რუსთავი 2“–ის ამ სარედაქციო პოლიტიკით არსებობა, როდესაც საკონსტიტუციო უმრავლესობა აქვს ოპონენტს, არის კრიტიკულად მნიშვნელოვანი. მედია, როგორც პროპაგანდა სახიფათოა მხოლოდ იმ შემთხვევაში, თუ ის არის ხელისუფლების დაქვემდებარებული. რომც დავუშვათ, რომ „რუსთავი 2“ არის ოპოზიციური პარტიის ერთ–ერთი ელემენტი, ის არ არის სახიფათო“.
მანანა ღოღობერიძე
