„საქართველო შესაძლოა იყოს ბრიტანეთის ბიზნესისთვის საუკეთესო რეგიონული პლატფორმა“, – ამის შესახებ საქართველოს საგარეო საქმეთა მინისტრმა მიხეილ ჯანელიძემ გაერთიანებული სამეფოს ევროპისა და ამერიკის საკითხებში სახელმწიფო მინისტრის სერ ალან დუნკანთან გამართული პრესკონფერენციის დროს განაცხადა, რომელიც თბილისს „უორდროპის სტრატეგიული დიალოგის“ მესამე რაუნდის ფარგლებში ეწვია.
საქართველოს საგარეო საქმეთა მინისტრმა მადლობა გადაუხადა სახელმწიფო მინისტრს საქართველოში სტუმრობისთვის და ასევე იმ მხარდამჭერი განცხადებისთვის, რომელიც მან საქართველოში გამართულ საპარლამენტო არჩევნებთან დაკავშირებით გააკეთა.
მინისტრმა გაერთიანებულ სამეფოსთან თანამშრომლობის ერთ-ერთ პრიორიტეტულ მიმართულებად ეკონომიკა დაასახელა. მისი თქმით გაერთიანებული სამეფო არის ერთერთი მთავარი ინვესტორი საქართველოში და მნიშვნელოვანია, რომ ბრიტანეთში უფრო მეტად წარმოჩინდეს საქართველოს, როგორც ინვესტორებისთვის მიმზიდველი ქვეყნის იმიჯი.
„საქართველო არის ღია ეკონომიკა და ჩვენ მზად ვართ გავაგრძელოთ თავისუფალი ვაჭრობა, ეკონომიკური კავშირები, ხელი შევუწყოთ ბიზნეს ურთიერთობებს და საქართველოს იყოს ბრიტანული ბიზნესისთვის, როგორც პლატფორმა რეგიონში ბიზნესის საკეთებლად.
ჩვენი სტრატეგიული თანამშრომლობის ძირითად მიმართულებას ეკონომიკა წარმოადგენს. ჩვენ ვთანამშრომლობთ უკვე მრავალი წელია და დიდი ბრიტანეთი არის ერთერთი მთავარი ინვესტორი ქართულ ეკონომიკაში. ძალიან მნიშვნელოვანია, რომ წელს აღვნიშნავთ ოცი წლისთავს British Petrolium-ის საქართველოში ოპერირების და ინვესტირების დაწყების შემდეგ. ეს იყო პირველი სტრატეგიული მნიშვნელობის პროექტი, რომელიც განვითარდა და მასზე დაფუძნებით ჩვენ ვანვითარებთ სხვა პროექტებსაც. BP აგრძელებს ინვესტირებას და პროექტების განვითარებას, რომელიც ხელს უწყობს ევროპის ენერგოუსაფრთხოებას და წარმოაჩენს საქართველოს, როგორც სტრატეგიულ პარტნიორს ამ მიმართულებით.“ – განაცხადა მიხეილ ჯანელიძემ.
პრესკონფერენციაზე განსაკუთრებით აღინიშნა ორ ქვეყანას შორის არსებული მჭიდრო ურთიერთობები განათლების, კულტურისა და მეცნიერების სფეროში, რისი თვალსაჩინო მაგალითიცაა ბრიტანეთის მთავრობის სტიპენდიით განხორციელებული გაცვლითი საგანმანათლებლო პროგრამები, ასევე შექსპირისა და რუსთაველის საიუბილეო წლებისადმი მიძღვნილი სპეციალური პროექტი.
ორმხრივი პოლიტიკური დიალოგის ფორმატი საქართველოსა და დიდი ბრიტანეთის გაერთიანებულ სამეფოს შორის 2014 წელს დაფუძნდა. იგი ქართულ-ბრიტანული თანამშრომლობის საკითხთა ფართო სპექტრის განხილვას ემსახურება და განიხილება პოლიტიკურ, უსაფრთხოების, თავდაცვის, ეკონომიკის, კულტურისა და, განათლების სფეროში თანამშრომლობის საკითხები.
