„მზად ვარ კრიტიკა გამოვიწვიო, მთავარია გამოვიწვიო დებატი განათლების თემებზე. ვისაც უნდა, რომ მათი შვილები დაემსგავსონ კომბლეს, ნაცარქექიას, ჩვენ ვერ დავუშლით, თუმცა ვისაუბროთ, ვისმჯელოთ ამ თემებზე“. სკოლამდელი განათლების ხარვეზებზე და თბილისის სახელმწიფო უნივერსიტეტში მიმდინარე პროცესების შესახებ განათლებისა და მეცნიერების მინისტრის მოვალეობის შემსრულებელმა ალექსანდრე ჯეჯელავამ „ტვ პირველზე“, გადაცემა „შეკითხვის დროს“ ეთერში ისაუბრა.
„სკოლამდელი განათლება სულ მთლად სიმღერაზე და ცეკვაზეა აგებული. თუმცა ეს არის პერიოდი, როდესაც ბავშვს უყალიბდება ფასეულობები. თუ საზოგადოებაში არსებული პროცესები არ მოგვწონს, მხოლოდ ფიზიკის და ქიმიის ცოდნის დეფიციტის ბრალი არ არის. საიდან მოდის ამდენი ძალადობა, ღვარძლი, ეშმაკობა, ტყუილი, ქონების წართმევა. განათლებას უნდა შევხედოთ კომპლექსურად. ტაბუირებული თემებით და ფასადური რეფორმებით არ ეშველა 25 წელი ჩვენი განათლების სისტემას და არ ეშველება კიდევ 25 წელი.
ნუ შეუშლიან ხელს ათასობით ახალგაზრდას განათლების მიღებაში, სწორედ ამას აკეთებენ ახლა. ჩემი კარი ყოველთვის ღია იყო მათთვის, ასევე რექტორის და ყველა სხვა ინსტანციის. ეს არის სტუდენტების მცირე ჯგუფი, რომელიც მოქმედების არასწორ მეთოდებს ირჩევს. ამბობენ, რომ თითქოს პრემიერ–მინისტრმა არ შეასრულა მოთხოვნები. მე მაქვს მათი მოთხოვნების ჩამონათვალი და ნაწილი მათგანი უკვე მოგვარებულია. კანონის ცვლილებებს რაც შეეხება, ჰკითხეთ მათ შეცვალეს თუ არა მოსაზრება კანონთან დაკავშირებით მაშინ ,როდესაც მე უკვე შეთანხმებული მქონდა მთავრობასთან.
კომუნიკაციები იყო, და ბევრი მათი თანამოაზრე დღეს მონაწილოებს უნივერსიტეტის სტრატეგიულ დაგეგმვაში, ბიუჯეტის განაწილებაში, თვითმმართველობისთვის დაფინანსების ახალი სქემის შექმნაში, სტუდენტური საცხოვრისის პირობების გაუმჯობესებაში. დანარჩენები კი ცდილობენ ამ არასწორი მეთოდებით ხელი შეუშალონ სასწავლო პროცესს. მიუხედავად ამისა მივესალმებით მხოლოდ მათ მოთხოვნებს. ვთხოვთ ნუ გაუფუჭებენ საქმეს ათასობით მეგობარს. ამის ნაცვლად ესაუბრონ რექტორს, განათლების კომიტეტს, გვესაუბრონ ჩვენ, სამინისტროს“.
მანანა ღოღობერიძე
