„მისი შემსუბუქება იქნება ანტისახელმწიფოებრივი მოქმედება. ეს არის პირდაპირი გზა, რასაც რუსეთი მოითხოვს ჩვენგან, ვაღიაროთ აფხაზეთის დამოუკიდებლობა და შევეგუოთ ოკუპირებულ რეალობას“. ოკუპაციის შესახებ კანონში შესაძლო ცვლილებების შესახებ „აფხაზთა კრების“ ლიდერმა მალხაზ პატარაიამ „ტვ პირველზე“, გადაცემა „შეკითხვის დროს“ ეთერში ისაუბრა.
„სახელმწიფო არის ერთიანი და მის რომელიმე ნაწილზე, თუნდაც ოკუპირებულ ტერიტორიაზე განსხვავებული სამართლებრივი რეჟიმის დამყარება ნიშნავს სხვა საკითხებშიც განსხვავებული სამართლებრივი რეჟიმის დამყარებას და არის პირდაპირი გზა აფხაზეთის აღიარებისკენ. კანონში ცვლილებები არის უბრალოდ კანონის დაზუსტება და რაიმე არსობრივი სიახლე არ შესულა. ჩემი აზრით კანონი კიდევ უფრო გასამძაფრებელია. კანონში დეტალურად არ არის ოკუპაციის ქრესტომათია, შესაბამისობაშია მოსაყვანი ოკუპაციის შესახებ და დევნილთა შესახებ კანონონები, მასში მკაფიოდ უნდა იქნეს მითითებული ის დანაშაულები, რომლებიც მოხდა აფხაზეთსა და ცხინვალის რეგიონში.
აქ არის ხელისუფლების პასუხისმგებლობა, რომ კანონი სათანადოდ არ სრულდება. ეს კანონი ვრცელდება იმ პირებზე, რომლებიც არ არიან საქართველოს მოქალაქეები ან ზოგადად არ აქვთ არც ერთი ქვეყნის მოქალაქეობა. საქართველოს მოქალაქეებზე ეს კანონი არ ვრცელდება. ენგურზე გადაადგილებას ხელ უშლის არა კანონი, არამედ თავად საოკუპაციო ურთიერთობები. რაც შეეხება სისხლის სამართლის კოდექსს, 322-ე პრიმა მუხლი ითვალისწინებს სისხლის სამართლებრივ პასუხსიმგებლობას, მაგრამ ჯარიმით. ამიტომ ხელახალი შემოღების აუცილებლობა არ არის. მოსამართლემ უნდა განსაზღვროს რა შემთხვევაშია ჯარიმა და რა შემთხვევაში უფრო მძიმე სასჯელი. კანონმდებლობის არ ცოდნა არ ათავისუფლებს პირს ნებისმიერ ქვეყანაში,“–განაცხადა მალხაზ პატარაიამ.
მანანა ღოღობერიძე