„2016 წლის დასაწყისიდან სააგენტოს აქვს დაჯარიმების უფლება და ადმინისტრაციული კოდექსით რეაგირებს, მიმდინარეობს მონიტორინგი 24 საათის განმავლობაში.წლის განმავლობაში ცხოველთა მოვლა–პატრონობის წესის 600–ზე მეტი დარღვევა დაფიქსირდა“. ამის შესახებ ცხოველთა მონიტორინგის სააგენტოს უფროსმა თემურ ფხალაძემ ტელეკომპანია „რუსთავი 2“–ზე, გადაცემა „დილა მშვიდობისა საქართველოს“ ეთერში ისაუბრა.
„სააგენტო დარღვევებზე ახდენს რეაგირებას ადმინისტრაციულ სამართალდარღვევათა კოდექსის მიხევით. თუ არ მოხდება დასუფთავება, ჯარიმა შეადგენს 8 ლარს. ხოლო ძაღლის აშვების და ალიკაპის გარეშე სეირნობის შემთხვევაში, 20 ლარიანი ჯარიმა მოქმედებს. როგორც ძაღლს სჭირდება გაწვრთნა, ასევე სჭირდება მოსახლეობის ცნობიერებას ამაღლება. სააგენტომ შეიმუშავა სპეციალური პროგრამა, რომელსაც გაკვეთილების სახით სკოლებში ვკითხულობთ. ჯობს ახალგაზრდა თაობიდან დავიწყოთ ცხოველებზე ჰუმანური მოპყრობის სწავლება.
მოსახლეობის ცნობიერების ამაღლების და სანიტარულ–ჰიგიენური მდგომარეობის გაუმჯობესების მიზნით ცხოველთა მონიტორინგის სააგენტომ დაიწყო კამპანია სახელწოდებით „ერთად ვიზრუნოთ დედაქალაქზე და შევქმნათ უსაფრთხო გარემო“, რომლის ფარგლებშიც სხვადასხვა ღონისძიებები ტარდება. ერთ–ერთი არის დედაქალაქის ქუჩებში, ბაღებსა და სკვერებში საინფორმაციო ბანერების, ნიშნულების განთავსება. ეს ბანერები ცხოველთა პატრონებს მიუთითებს თუ როგორ უნდა მოიქცნენ , რომ არ დაირღვეს მოვლა–პატრონობის წესი“.
ცხოველთა მოვლა–პატრონის წესებზე ასევე ცხოველთა მონიტორინგის სააგენტოს რეაგირების განყოფილების წარმომადგენელმა ვახო ჭელიძემ ისაუბრა
„პატრულირებაქუჩებში და სკვერებში 24 საათის განმავლობაში მიმდინარეობს. მონიტორინგი ხშირად ფეხითაც ხდება. სეირნობისას პატრონს ძაღლი უნდა ჰყავდეს მოკლე საბმელით და ალიკაპით,საღამოს 7 საათიდან დილის 11 საათამდე მხოლოდ ალიკაპითაც არის შესაძლებელი. მნიშვნელოვანია, რომ სტატისტიკით დაკბენის ფაქტები უმეტესად პატრონიან ცხოველებზე მოდის. პროექტზე მუშაობა აქტიურად მიმდინარეობს, მომავალი წლის დასაწყისიდან უკვე ნელ–ნელა დაიწყება სპეციალური გასასეირნებელი ადგილების გახსნა. აქ ცხოველის პატრონს საშუალება ექნება ძაღლი გაუშვას, ასეირნოს ყოველგვარი შეზღუდვების გარეშე. იქ დამონტაჟებული იქნება წინაღობები, სავარჯიშოები, რომ ცხოველმა სრულყოფილად შეძლოს ფიზიკური აქტივობა“.
მანანა ღოღობერიძე
