ყველა ნაბიჯი, რომელსაც ჩვენ ვდგამთ, მიმართულია იმისკენ, რომ გვქონდეს განვითარების მეტი დინამიკა, ვიდრე ეს ჩვენს გარშემო, სამეზობლოსა და ქვეყნებშია. ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე განაცხადა.
“ეს არის ჩვეულებრივი კონკურენცია, საქართველო იმყოფება კონკურენციაში ინვესტიციების მოზიდვის კუთხით. ამიტომ, ჩვენი კონკურენტუნარიანობის მაჩვენებლები უნდა იყოს უკეთესი, რათა რეგიონში წამოსული ინვესტიციის დიდი ნაწილი მოხვდეს საქართველოში. აქედან გამომდინარე, ჩვენ გვჭირდება იმ მიმართულებებზე მეტი აქცენტების გაკეთება, რომელსაც შეუძლია მეტი სავალუტო შემოსავლების გენერირება, მეტი ინვესტიციების მოზიდვა. ყველა ნაბიჯი, რომელსაც ჩვენ ვდგამთ, არის სწორედ აქეთკენ მიმართული”, – აღნიშნა პრემიერ-მინისტრმა.
მისივე თქმით, შესაძლებელია, ფინანსური რესურსი, რომელიც ყოველწლიურად მთავრობას აქვს, მიმართოს სოციალური პრობლემების მოგვარებისკენ, მაგრამ ჩაკეტილ წრეზე სიარული უნდა დასრულდეს.
“ჩვენ გვაქვს დაბალანსებული მიდგომა. კიდევ ერთხელ ვამბობ, ჩვენი ბიუჯეტი არის მიმართული იქითკენ, რომ ერთხელ და სამუდამოდ გამოვიდეთ იმ ჩაკეტილი წრიდან, რომელშიც ათწლეულების განმავლობაში ვიმყოფებით, ერთხელ და სამუდამოდ წავიდეთ იმ მიმართულებით, რომ ქვეყანაში გადაიჭრას ეკონომიკური პრობლემები, რომელიც ჩვენ გვაქვს. ეს არის ეკონომიკის სტრუქტურული გაუმჯობესება და გაჯანსაღება, ეს არის წარმოების იმ მიმართულებების განვითარება, რომელიც ექსპორტზე იქნება მიმართული, ეს არის იმ სერვისების განვითარება, რომელიც ასევე უცხოური ვალუტის გენერირებაზე იქნება ორიენტირებული და ეს უპირველეს ყოვლისა, არის ტურიზმი. ტურისტულ ინფრასტრუქტურაში იხარჯება უამრავი რესურსი. ყოველივე ამის შედეგად, ჩვენ ვერ ვიქნებით დამოუკიდებელი სხვა პროცესებისგან, მაგრამ ერთი რამე შეგვიძლია ვთქვათ, თუ ჩვენს რეგიონში იქნება მაღალი განვითარების დინამიკა, საქართველოს ექნება კიდევ უფრო მაღალი განვითარების მაჩვენებლები, თუ ჩვენს რეგიონში იქნება არასახარბიელო ეკონომიკური მდგომარეობა, ჩვენ მაინც გვექნება უკეთესი მაჩვენებლები”, – აღნიშნა გიორგი კვირიკაშვილმა.
