ადამიანებს, რომლებმაც შსს-ს რიგებში მუშაობის რესურსი ამოწურეს მადლობას გადავუხდით და დავემშვიდობებით, – ამის შესახებ საქართველოს შინაგან საქმეთა მინისტრმა გიორგი მღებრიშვილმა განაცხადა.
როგორც მღებრიშვილმა დღეს ჟურნალისტებს განუცხადა, უკვე მიცემული აქვს დავალება მოადგილეებისა და დეპარტამენტის თავმჯდომარეებისთვის, წარმოადგინონ იმ თანამშრომლების სია, რომლებიც საქმიანობის პერიოდში ნაკლებად პროდუქტიულები იყვნენ.
„ჩვენ ამ სიას ინდივიდუალურად გავივლით. იმ ადამიანებს, რომლებსაც ამუწურული აქვთ რესურსი შსს-ში რიგებში მუშაობისა, გადავუხდით მადლობას და დავემშვიდობებით. გარდა იმისა, რაც მე მოგახსენეთ, რომლებიც გამოირჩევიან შეურაცხმყოფელი საქციელით და შეურაცხყოფას აყენებენ პოლიციის მუნდირს და თითოეულ პოლიციელს”, – განაცხადა მღებრიშვილმა.
მღებრიშვილმა დღეს კიდევ ერთხელ გააკეთა კომენტარი ბორჯომში ტელეკომპანია „იბერიის“ ჟურნალისტის პოლიციელის მხრიდან შეურაცხყოფის ფაქტზე.
როგორც მღებრიშვილმა აღნიშნა, საქმეს პროკურატურა იძიებს, პირადად მისი პოზიცია კი უკვე გამოხატა ერთმნიშვნელოვნად, რომ ასეთი თანამშრომლები სისტემაში არ უნდა მუშაობდნენ.
“ჩვენი თანამშრომელი ფიგურირებს ამ საქმეში და შესაბამის გადაწყვეტილებას მიიღებს პროკურატურა. რაც შეეხება ამ პოლიციელს, თქვენ ალბათ საქმის კურსში ხართ, რომ აღარ მუშაობს შსს-ში, მან დაწერა პატაკი გათავისუფლების თაობაზე და ჩვენ ის დავუკმაყოფილეთ. პასუხისგებაში მიეცემა, თუ არ მიეცემა, კომპეტენტურ პასუხს პროკურატურა გაგცემთ. პოზიცია ამ კონკრეტულ შემთხვევასთან დაკავშირებით ცალსახად გამოვხატე. ასეთი თანამშრომლები სისტემაში არ უნდა მუშაობდნენ”, – განაცხადა მღებრიშვილმა.
