“ადმინისტრაციული ხარჯები საჯარო სამსახურებში იყო გაბერილი.ამ პრობლემის დაძლევას ემსახურება ჩვენი გეგმა და ოპტიმიზაცია. საუბარია ხარჯების 10 %-იან შემცირებაზე”. 2016 წლის მიღწევებზე, ცვლილებებზე და მომავალი წლის გეგმებზე საქართველოს პარლამენტის თავმჯდომარემ ირაკლი კობახიძემ ტელეკომპანია “GDS”-ზე, გადაცემა “2030”-ის ეთერში ისაუბრა.
“გვინდოდა, რომ ახლადარჩეულ პარლამენტს კიდევ ერთხელ დაეფიქსირებინა თავისი პოზიცია საგარეო პოლიტიკასთან მიმართებაში. საქართველოს პარლამენტში ჩვენი ინიციატივით იქნა წარდგენილი რეზოლუცია. მასში ასახულია ყველა სტრატეგიული პრიორიტეტი, მათ შორის დეოკუპაცია, პრაგმატული პოლიტიკა, ევროატლანტიკურ სტრუქტურებში ინტეგრაცია. დარწმუნებული ვარ, რომ ვიზალიბერალიზაციის პროცესი ძალიან მალე წარმატებით დასრულდება. რუსეთთან გვაქვს პრაგმატული პოლიტიკა, რომელიც აღიარებულია დასავლელი პარტნიორების მიერ. რუსეთთან სავიზო მიმოსვლის შესაძლო გამარტივება ბუნებრივია დადებითად აისახება ჩვენს მოქალაქეებზე და ამ კუთხით პროგრესს მივესალმებით. ჩვენი ამოცანაა პრაგმატული პოლიტიკის საფუძველზე მაქსიმალური პროგრესის მიღწევა.
ჩვენ მივიღეთ კანონპროექტების პაკეტი, რომელთა მიზანია მაქსიმალურად დავაზღვიოთ ჩვენი მოქალაქეები იმ რისკებისგან, რომლებიც სავალუტო კურსის მერყეობასთან არის დაკავშირებული. პაკეტი ითვალისწინებს დედოლარიზაციის გეგმას. ეს უზრუნველყოფს მოქალაქეების დაზღვევას, მათ შორის კრედიტების გამოტანის შემთხვევაში. მთავრობას ეკონომიკური განვითარების მკაფიო ხედვა აქვს. განსაკუთრებული აქცენტი ამ მიმართულებაზე კეთდება. დოლარიზაცია იყო წინა ხელისუფლების შედეგი, დღეს ვმუშაობთ იმაზე, რომ ეს ნეგატიური ეფექტი მაქსიმალურად გავანეიტრალოთ.
ოპტიმიზმს აქვს კონკრეტული საფუძველი. მნიშვნელოვანი არჩევნები გამოვიარეთ, გრძელდება კურსი, რომელიც ჩვენმა ქვეყანამ აიღო 2012 წელს. მომავალი წლიდან ეს კურსი უნდა გაგრძელდეს ახალი შემართებით. სწრაფი განვითარება ჩვენი ამოცანაა. საკონსტიტუციო კომისიას ორი ძირითადი მიზანი აქვს. პირველი არის კონსტიტუციის შესაბამისობის უზრუნველყოფა კონსტიტუციური სამართლის პრინციპებთან. არის მთელი რიგი წინააღმდეგობები, ეს ნორმები საჭიროებს გასწორებას. ჩვენი მიზანია მაქსიმალურად დავხვეწოთ ჩვენი მთავარი იურიდიული დოკუმენტი. მეორე საკითხია, რომ ჩამოვაყალიბოთ კონსტიტუციური მმართველობის ისეთი მოდელი, რომელიც მაქსიმალურად იქნება ჩვენი ქვეყნის დემოკრატიული განვითარების ინტერესებთან. საარჩევნო კოდექსში გარკვეული ცვლილებები უნდა შევიდეს ჯერ კიდევ მუნიციპალურ არჩევნებამდე.
შემდეგი სესიის განმავლობაში შესაძლებელია კანონპროექტების პაკეტის მიღება, რომელიც უზრუნველყოფს ნარკოპოლიტიკის ლიბერალიზაციას. უკვე დაწყებულია მსჯელობა, ჩართულია სამთავრობო უწყებებიც და არასამთავრობო ორგანიზაციები.აქაც მთავარი მიზანია ადამიანის უფლებების დაცვა”-განაცხადა ირაკლი კობახიძემ.
მანანა ღოღობერიძე
