“ტარიფის გაზრდა არ არის აუცილებელი. თუ იქნება საჭიროება, რომ ენერგეტიკა ვერ გადაიტანს, კომპანიას ექნება სერიოზული პრობლემები, რა თქმა უნდა მარეგულირებელი კომისია იმას არ დაუშვებს, რომ ქვეყანა ჩავაბნელოთ, ელექტროენერგია გრაფიკით მივაწოდოთ მოსახლეობას. ეს აღარ იქნება, საქართველოში არასდროს არ დაბრუნდება 90-იანი წლები”. 2016 წლის მთავარ პოლიტიკურ მოვლენებზე, წარმატებულ პროექტებზე და მომავალ წელს დაგეგმილ ცვლილებებზე ენერგეტიკის მინისტრმა, ვიცე-პრემიერმა კახი კალაძემ ტელეკომპანია “იმედზე”, გადაცემა “ღია ეთერში” ისაუბრა.
“ჩვენს ოპონენტებს ეს ეწყინათ, რადგან სანამ ეს გადაწყვეტილება იქნებოდა მიღებული, ვისმენდით არაადეკვატურ განცხადებებს, უბრალო პოლიტიკური დემაგოგიის ნაწილს. თუ ტარიფის გაზრდასთან დაკავშირებით რაიმე ცვლილება იქნება, ამას ადგენს მარეგულირებელი კომისია. ეს მათი პრეროგატივაა, თუმცა ამის მიუხედავად ჩვენ სამინისტროში გვყავს პროფესიონალები, რომლებიც აკეთებენ წინასწარ გათვლებს. საერთაშორისო ბაზარზე დაეცა ელექტროენერგიის ფასი, პარტნიორებისგან გაცილებით ნაკლებად გვიწევს ყიდვა, ვიდრე ეს იყო გათვალისწინებული. ძალიან საინტერესო წელი იყო. პოლიტიკური თვალსაზრისით ყველაზე მნიშნვნელოვანი იყო საპარლამენტო არჩევნები და ნამდვილად მეამაყება ის, რომ ჩავატარეთ აბსოლიტურად გამჭვირვალე, თავისუფალი არჩევნები. ეს არის სტანდარტი, რომლის ქვემოთაც არ უნდა ჩამოვიდეთ.
კოალიციის დაშლის გადაწყვეტილება როდესაც მივიღეთ ეს იყო მოსახლეობის პატივისცემაც. მათ მივეცით შესაძლებლობა თავიანთი გემოვნების მიხედვით გაეკეთებინათ არჩევანი. ყველაფერი ჩადგა თავის კალაპოტში. მოსახლეობამ განაჩენი გამოუტანა ყველა პარტიას. აბსოლიტურად მოსუფთავებული პოლიტიკური ველი იძლევა იმის შესაძლებლობას, რომ პოლიტიკაში ახალი სახეები გამოჩნდნენ.
ეკონომიკური მდგომარეობა ყოველთვის იყო ხელისუფლებების მთავარი გამოწვევა. საქართველო განვითარებადი ქვეყანაა, ბევრი გვაქვს სამუშაო ეკონომიკური წინსვლისთვის. ყველაზე მეტი, რაც სჭირდება ჩვენს მოქალაქეებს, ეს არის ახალი სამუშაო ადგილები. 4 პუნქტიანი გეგმა მოგვცემს საშუალებას ოთხი წლის შემდეგ ვიხილოთ თვისობრივად განსხვავებული ქვეყანა. სადაც იქნება კიდევ 200 ათასი ახალი სამუშაო ადგილი.
ის, რაც დღეს “ნაციონალურ მოძრაობაში” ხდება, საზოგადოების დიდი ნაწილისთვის არ არის საინტერესო. ეს უფრო საინტერესოა მათი მხარდამჭერებისთვის. ორი შიდა ძალა ინაწილებს ძალაუფლებას. “ნაციონალურ მოძრაობას” აღვიქვამ დესტრუქციულ ძალად. ეს არის უპასუხისმგებლო ადამიანებისგან შემდგარი ჯგუფი. წინასაახალწლოდ არ მინდოდა ამაზე საუბარი, თუმცა გვიწევს.
ხარჯების შემცირება უკვე დაგეგმილი გვაქვს, მომზადებული გვაქვს თუ როგორ უნდა განხორციელდეს. ეს არ მოხდება ადამიანების გაშვების ხარჯზე. მე სამინისტროში მოვახერხე და გამოვნახე რესურსი, რომ ადამიანები არ გამეშვა,”-განაცხადა კახი კალაძემ.
მანანა ღოღობერიძე
