„შესაძლებელია ხელისუფლებას ჰქონდეს თავისი ინტერესი და ფსონს აკეთებდეს რომელიმე კანდიდატზე, მაგრამ შემიძლია დავადასტურო, რომ ჩემთან მიმართებაში ამ თემაზე არანაირი კომუნიკაცია არ ყოფილა“. ამის შესახებ საზოგადოებრივი მაუწყებლის სამეურვეო საბჭოს წევრმა სულხან სალაძემ „რუსთავი 2“–ზე, გადაცემა „კურიერის“ ეთერში ისაუბრა.
„გულწრფელად გეუბნებით, რომ არ მაქვს არანაირი ინფორმაცია სამეურვეო საბჭოს რომელიმე წევრთან იყო მცდელობა, რომ რომელიმე კანდიდატი გახდეს დირექტორი. შეიძლება ყველაფერი შეიცვალოს მაუწყებელში, ინფრასტრუქტურაც განვითარდეს, მოწესრიგდეს შრომითი ურთიერთობები თანამშრომლებთან, მაგრამ თუ კი მაუწყებელი მოექცევა რომელიმე პოლიტიკური ჯგუფის ინტერესის ან გავლენის ქვეშ, ცხადია ის ვერ შეასრულებს იმ ვალდებულებებს, რომელიც აქვს დაკისრებული.
ის ადამიანი, ვისზეც არჩევანს გავაკეთებ, სავარაუდოდ გახდება საზოგადოებრივი მაუწყებლის გენერალური დირექტორი. ჩემი მთავარი კითხვები დაკავშირებული იყო პოლიტიკური გავლენის მცდელობისგან საზოგადოებრივი მაუწყებლის დაცვის რა მექანიზმები შეიძლება ჰქონდეს პოტენციურ დირექტორობის კანდიდატს.
იმედი მაქვს, რომ საბჭოს წევრები დამოუკიდებლები იქნებიან, მაგრამ არც იმას გამოვრიცხავ, რომ დღეს სამეურვეო საბჭომ ვერ აირჩიოს გენერალური დირექტორი. თეორიულად ეს შეიძლება ასეც მოხდეს, ვინაიდან დადგენილია პროცედურა. მეორე ტური შესაძლოა რამდენიმე ტურად გაიმართოს. 5 ხმა თუ ვერ მიიღო ვერც ერთმა კანდიდატმა, მაშინ საუკეთესო ქულის კანდიდატები გადადიან უკვე მეორე ტურის მეორე ტურში. შესაძლებელია ღია კენჭისყრამდე მივიდეს საქმე. დანამდვილებით იმის თქმა, რომ დღეს საბჭო აუცილებლად აირჩევს გენერალურ დირექტორს, მე ნამდვილად არ შემიძლია“.
მანანა ღოღობერიძე
