„ამგვარ საგამოძიებო მოქმედებებზე საპარლამენტო კონტროლი უნდა იყოს გაძლიერებული. უნდა შეიქმნას სხვადასხვა ორგანოს წარმომადგენლებისგან დაკომპლექტებული ნდობის ჯგუფი, რომელიც ზედამხედველობას და მკაცრ მონიტორინგს გაუწევს ფარულ საგამოძიებო მოქმედებებს“. მოსმენების შესახებ კანონში შესატან ცვლილებებზე ფრაქცია „ქართული ოცნების“ თავმჯდომარემ მამუკა მდინარაძემ „რუსთავი 2“–ზე, გადაცემა „კურიერის“ ეთერში ისაუბრა.
„საკონსტიტუციო სასამართლომ მიიღო უპრეცენდენტო გადაწყვეტილება და მისი შინაარსიდან გამომდინარეობს, რომ ფარულ საგამოძიებო მოქმედებებს არ უნდა ახორციელებდეს ის უწყება, რომელსაც პროფესიული ინტერესები გააჩნია ფარული საგამოძიებო მოქმედებების მიმართ. არასამთავრობო ორგანიზაციებმა წარმოგვიდგინეს სქემა, როგორ უნდა შეიქმნას დამოუკიდებელი ორგანო, რომელიც უზრუნველყოფს ფარულ საგამოძიებო მოქმედებებს, მათში მხოლოდ მოსმენები არ იგულისხმება.
არასამთავრობო სექტორის შემოთავაზებული გეგმის აღსრულება ძნელია, რადგან პრაქტიკულად პრეცედენტი მსოფლიოში ანალოგი არ არსებობს, უნდა გამოვიგონოთ ახალი ველოსიპედი. მისმა მუშაობამ რამდენად შეიძლება მოუტანოს უსაფრთხოება ჩვენს ქვეყანას, არ გვაქვს გარანტიები. გარდა ამისა გვაქვს პერსონალურ მონაცემთა დაცვის ინსპექცია და მას დაემატება საპარლამენტო კონტროლი,“–განაცხადა მამუკა მდინარაძემ.
მანანა ღოღობერიძე
