„რანაირად არის მიხეილ სააკაშვილი საქართველოს სინონიმი. ამის პრეტენზია ილია ჭავჭავაძესაც არ ჰქონია. მისი საუბრიდან გამოდის, რომ ერთადერთი იდეა არის თვითონ, ერთი კონკრეტული ადამიანი და ამ იდეის მსახურება არის მხოლოდ ერთგულება, სხვა ყველაფერი კი ღალატი“.ამის შესახებ თბილისის ყოფილმა მერმა, „ერთიანი ნაციონალური მოძრაობის“ ყოფილმა ლიდერმა გიგი უგულავამ „რუსთავი 2“-ზე, გადაცემა „არჩევანის“ ეთერში ისაუბრა.
„მე მეჩვენება, რომ მიშა გადასულია რაღაც საკუთარი ისტორიული ოდისეის წერაზე, რომელსაც არანაირი კავშირი აღარ აქვს ხალხზე ზრუნვასთან. გამოდის, რომ იდეა აღარ არის ევროპული საქართველო, ადამიანების კეთილდღეობა, ქვეყნის ნატოსა და ევროკავშირში გაწევრიანება.
ეს არასწორია, ჩვენ ვემსახურებით საზოგადოებას, არ არსებობს შეუცვლელი ადამიანები. მიხეილ სააკაშვილი სწორ პოლიტიკურ ფორმაში არ არის. დარწმუნებული ვარ, რომ ადამიანურად გაუხარდა ჩემი ციხიდან გამოსვლა. თუმცა მისი განცხადებები იაფფასიანი ჩქმეტები იყო.
გაბრაზებული არ ვარ მიშაზე საერთოდ, ერთ ნაწილს თუ არ ჩავთვლით. პარტიის, დანგრევის პასუხისმგებლობა მასზეა, რომელსაც ასეთი მისია ჰქონდა. ის, რაც მოხდა არის პარტიის დანგრევა, შეგვიძლია სირაქლემასავით ვთქვათ, რომ ეს მცირე ჯგუფის დატოვებაა. სააკაშვილს ლიდერობაში არავინ ეცილებოდა, ის ამ პარტიის ლიდერი იყო. თუ თანაცხოვრება შეუძლებელია, მეტასტაზები მეოთხე სტადიაა და რესურსები ამოწურულია, ბოლოს და ბოლოს ჩვენი ამომრჩევლის თვალში ეს ყველაფერი სასაცილო იყო. მიშა გამწვავებაზე წამოვიდა მაშინ, როდესაც პირველი ფუნდამენტურად არასწორი, კატასტროფული მოთხოვნა დააყენა, პარლამენტში არშესვლის თაობაზე.
თუ არჩევანი იყო ქვეყნის დატოვება ან ციხეში წასვლა, მე სწორი არჩევანი გავაკეთე. ვწუხვარ თუ ამის გამო ვინმე კომპლექსდება. ეს არ ნიშნავს, რომ პრეტენზიას ვუყენებ მიხეილ სააკაშვილს. გასაგები იყო, რომ ივანიშვილი მასაც დაიჭერდა,“-განაცხადა გიგი უგუავამ.
მანანა ღოღობერიძე
