„აშშ–სა და რუსეთს შორის ურთიერთობების დალაგება მთელი მსოფლიოს და ცივილიზებული სამყაროს ინტერესებშია. პრეზიდენტ პუტინის ყველაზე წარმოუდგენელი ოცნებების ახდენის დღე დადგა“. აშშ–რუსეთის ურთიერთობებზე და დონალდ ტრამპის ადმინისტრაციის პირობებში საქართველოსთვის მთავარ გამოწვევებზე თავდაცვის ყოფილმა მინისტრმა, თინა ხიდაშელმა „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
მსოფლიო გაიღვიძებს ახალ რეალობაში, მსოფლიოს წამყვანი ქვეყნის პრეზიდენტი იქნება დონალდ ტრამპი. ვერ იპოვით ვერც ერთ პოლიტიკოსს, რომელიც არ იყო ჩართული ტრამპის საარჩევნო კამპანიაში და ოპტიმიზმით საუბრობდეს ამ დღეზე. ყველა, ვისაც მსოფლიო პოლიტიკა გვაინტერესებს, ღამეებს ვათენებდით სენატში მიმდინარე მოსმენების ყურებაში. ჩვენ მოვისმინეთ მათი განცხადებები, ვიცით წარსული და არ გვაქვს განსაკუთრებუილი ოპტიმიზმის საფუძველი. ტრამპი არის აბსოლიტურად არაორდინალური მოვლენა მსოფლიო პოლიტიკაში. პრეზიდენტი ტრამპი იქნება ასეთივე არაორდინალური პრეზიდენტი და საქართველოსნაირ ქვეყანასაც სჭირდება ასეთივე არაორდინალური დამოკიდებულება.
პირველ რიგში „გაზპრომის“ შანტაჟის მსხვერპლი არ უნდა გავხდეთ. ამ ხელშეკრულებაზე ხელმოწერა იყო ენერგეტიკის მინისტრის „ქართული ოცნება“. ეს არის ქვეყნის ინტერესების წინააღმდეგ გადადგმული ნაბიჯი. პასუხისმგებლიანი ქვეყნები ასე არ იქცევიან, გადაწყვეტილებებს შანტაჟის გამო არ იღებენ.
გვჭირდება რაც შეიძლება მეტი ინიციატივები. ჩვენ გვყავს თავდაცვის მინისტრი, რომელიც ერთმანეთის მიყოლებით სხვადასხვა ღონისძიებაზე არ მიდის და ელოდება სხვები როდის გადაწყვეტენ მის ბედს. ჩვენს ბედს არავინ გადაწყვეტს ისე, როგრც საქართველოს საუკეთესო ინტერესებშია. ეს განსაკუთრებით ძნელი იქნება აშშ–ის ახალი ადმინისტრაციის პირობებში.ისინი ყირიმის ანექსიას ანექსიად არ თვლიან და ამაში პრობლემას ვერ ხედავენ.
რუსეთი არ ებრძვის საქართველოს და უკრაინას, ის იბრძვის ყველაფერ იმის წინააღმდეგ, საითაც ისწრაფვის საქართველო. ამასობაში აშშ– ში, თავისუფალი სამყაროს წამყვანი, მედროშე ქვეყნის პრეზიდენტის ინაუგურაციაა, იმ კაცის, რომლის აზრითაც „ნატო“ მოძველებული ორგანიზაციაა და ამბობს, რომ მისი ნათესავები ჩაერთვებიან პოლიტიკურ საქმიანობაში,“–განაცხადა თინა ხიდაშელმა.
მანანა ღოღობერიძე
