“ამ ყველაფრის პოლიტიკური ლოგიკით ახსნა შეუძლებელია, მოვლენები ემოციების ფონზე განვითარდა. ფაქტობრივად, ერთი დაშლილი მანქანა მივიღეთ ცალკე, და ძრავი ცალკე. ისინი ერთად თუ არ არიან, არც ერთი არ მოძრაობ“–„ერთიან ნაციონალურ მოძრაობაში“ მიმდინარე პოლიტიკურ პროცესებზე ექსპერტმა გია ხუხაშვილმა „ტვ პირველზე“, გადაცემა „ვახო სანაიას დღის ამბების“ ეთერში ისაუბრა.
“ერთ მხარეს მივიღეთ ბელადი და მისი მრევლი, რომელშიც პოლიტიკური ინტელექტი, გამოცდილება და პოლიტიკური ტექნოლოგიების ფლობა არ არსებობს. მათ პოლიტიკური პარტია მხოლოდ პირობითად შეიძლება ვუწოდოთ. მეორე მხარეს მივიღეთ პოლიტიკური ელიტა, მაგრამ ელექტორალური თვალსაზრისით, შემოძარცვული.
„ნაციონალური მოძრაობის“ მონოლითი რწმენაზე იყო აგებული, ვიდრე რაიმე რაციონალურ ლოგიკაზე. შესაბამისად, ორივე დაზარალდა, ორივეს შეზღუდული პერსპექტივა აქვს. „ნაციონალური მოძრაობა“ ზოგადად დაზიანებული ბრენდია და ზრდის პოტენციალი შეზღუდული აქვს. უახლოეს პერიოდში ეს იქნება შემაფერხებელი ფაქტორი, რომ მესამე არჩევანი მოიზიდონ. მიუხედავად იმისა, რომ მათ ჩამოირეცხეს 9 წლიანი პოლიტიკური დანაშაული და აქ არ არიან ადამიანები, რომლებიც განსაკუთრებულ აგრესიასთან ასოცირდებოდნენ, პასუხისმგებლობას ბოლომდე ვერ გაექცევიან.
კოალიციები ნაკლებად მოსალოდნელია. გასაკვირია ხელისუფლების სიხარული და აღფრთოვანება. ის, რაც ხდება „ნაციონალურ მოძრაობაში“, არ არის სასარგებლო ხელისუფლებისთვის. დღეს ბევრად მეტი პოლიტიკური საფრთხეები გაჩნდა,”-განაცხადა გია ხუხაშვილმა.
მანანა ღოღობერიძე
