„თუ საქართველომ თავისი ფასი არ დაანახა, ტრამპი იმდენად მსხვილი ბიზნესმენია, რომ საქართველო მისთვის ძალიან პატარაა. ტრამპი არ მოვა საქართველოსთან, საქართველო უნდა მივიდეს ტრამპთან“. აშშ–ის 45–ე პრეზიდენტის პოლიტიკური პოზიციების შესახებ და აშშ–საქართველოს ურთიერთობების შესაძლო ცვლილებაზე საერთაშორისო ურთიერთობების ექსპერტმა, გიორგი რუხაძემ „რუსთავი 2“–ზე, გადაცემა „შაბათის კურიერის“ ეთერში ისაუბრა.
„თუ ტრამპის ინაუგურაციის სიტყვას გავაანალიზებთ, მარტივი მისახვედრია,რომ საგარეო პოლიტიკას ცოტა დრო დაუთმო. ფაქტობრივად ერთ აბზაცში ჩაატია. არ უსაუბრია ქვეყნებზე, პიროვნებებზე. ერთადერთი სახელი, რომელიც მან ახსენა, იყო „ისლამური სახელმწიფო“ და ყევლას შეპირდა,რომ მას ბოლომდე გაანადგურებდა. საგარეო პოლიტიკაზე მხოლოდ ის თქვა, რომ მოკავშირეები, რომელსაც შეიძენს და მთლიანად საგარეო კურსი იქნება ორიენტირებული იმაზე, რომ ეს ყევლაფერი მოხმარდეს ამერიკულ ოჯახებს და ამერიკის მოქალაქეებს.
უნდა ველოდეთ, რომ ტრამპის ადმინისტრაცია იქნება ნაკლებად აქტიური საქართველოს მიმართ. ის ჯერ კიდევ მსხვილი ბიზნესმენია და ყველაფერს ბიზნესის თვალით უყურებს. საგერო პოლიტიკასაც განიხილავს ეკონომიკურ ჭრილში. შესაბამისად საქართველოს მიმართაც პასიური პოზიციები იქნება. რამდენად დარჩება საქართველოს საკითხი ვაშინგტონის დღის წესრიგში დამოკიდებული იქნება საქართველოს პოზიციაზე, რამდენად აქტიურები ვიქნებით, რომ ჩვენი ქვეყანა საერთაშორისო დღის წესრიგში დავაბრუნოთ.
საქართველომ უნდა დაამტკიცოს, რომ რეგიონში ლიდერია და რეფორმების გზას დაადგეს. ისე, რომ საბოლოოდ იყოს ერთადერთი გამონაკლისი პოსტსაბჭოთა სივრცეში, სადაც ეს განხორციელდა. რუსეთთან მიმართებაში საქარველოს უნდა ჰქონდეს პრინციპული პოზიცია და პირდაპირ უნდა თქვას, რომ ნებისმიერი რამ, რაც შეიძლება მოხდეს აშშ–რუსეთს შორის, ძვირი დაუჯდება საქართველოს.
„კოკა– კოლას“ კონკურენტი არის „პეპსი“, „მაიკროსოფტის“ კონკურენტი არის „Apple“, შესაბამისად, „ჯენერალ მოტორსის“ კონკურენტი არ არის ლადა. ასევეა ტრამპის შემთხვვაშიც, ის კონკურენტად აღიქვამს ჩინეთს, რომელსაც ხშირად აკრიტიკებს. იგივე ევროკავშირის ქვეყნებს, იაპონიასა და სამხრეთ კორეას,“–განაცხადა რუხაძემ.
მანანა ღოღობერიძე
