„რუსეთი ღია შურისძიებაზე გადავიდა მას შემდეგ, როდესაც გაიგო, რომ საქართველოს ხელისუფლებამ მას მისცა ამის უფლება, რუსეთის სპეცსამსახურებს გახსნილი აქვთ ხელ–ფეხი“. უკრაინაში რუსული მხარის მოთხოვნით დაკავებული ვიცე–პოლკოვნიკ გია ცერცვაძის საქმეზე, უკრაინის ეროვნული პოლიციის ყოფილმა უფროსმა, „ერთიანი ნაციონალური მოძრაობის“ წევრმა, ხატია დეკანოიძემ, „რუსთავი2 „–ზე, გადაცემა „კურიერის“ ეთერში ისაუბრა.
„იმედი მაქვს,რომ უკრაინის სასამართლო გია ცერცვაძის რუსულ მხარეს არ გადასცემს. სამწუხაროა, რომ ჩვენი მებრძოლის ინტერესებს, ახლა უკრაინის სასამართლო იცავს და არა საქართველოს ხელისუფლება.
მარტივი ფორმულირება შეიძლება მოვუძებნოთ ზაქარია ქუცნაშვილის განცხადებას. საქმე გვაქვს ღალატთან. მან პირდაპირ აღიარა, რომ საქართველოს ხელისუფლება,სპეცსამსახურები უშუალოდ თანამშრომლობენ რუსეთის სპეცსამსახურებთან. ქართულმა მხარემ რუსეთის ფედერაციას გადასცა მთელი მონაცემთა ბაზა, იმ ქართველი სამხედროების შესახებ, რომლებიც მონაწილეობდნენ 2008 წლის რუსეთ–საქართველოს ომში. ეს ადამიანები რუსეთისთვის ბუნებრივია წარმოადგენდნენ საფრთხეს.
ეს არის ქმედება, რომელიც უკვე აღარ ბადებს კითხვებს, თუ რატომ ვაფორმებთ „გაზპრომთან“ ხელშეკრულებას. აღარავის უნდა გაუჩნდეს ეჭვი,რომ საქართველოს ხელისუფლება აბსოლიტურად მიბმულია რუსეთთან. შსს–ს და პროკურატურის განცხადება არის სამარცხვინო, რომელიც პირდაპირ ამბობს, რომ საქართველოს მოქალაქის ბედი, რომელიც სიცოცხლის ფასად იცავდა საქართველოს ტერიტორიულ მთლიანობას, მე არ მეხება და თავი დამანებეთ.
პირდაპირ, ბიძინა ივანიშვილის ხელისუფლება ხელდასმულია რუსეთის მხრიდან, ეს აშკარად გამოჩნდა. ეს ადამიანები, როდესაც რუსეთის ხელისუფლებას გადაეცემიან, ფიზიკური განადგურება ელოდებათ, არა მხოლოდ წამება და დაკითხვა. მიუხედავად ამისა,პროკურატურა იძახის, რომ არაფერი იცის. შსს ეყრდნობა აბსურდულ თეორიებს, რომ არ არის პოლიციური შეთანხმება–განაცხადა დეკანოიძემ.
მანანა ღოღობერიძე
