„დასადგენია, რატომ ჩავარდა სია, მათ პროცესის ხარვეზები დაინახეს, თუ კანდიდატების კომპეტენცია დაიწუნეს. სიის ჩავარდნა ჩემთვის არ ყოფილა მოულოდნელობა. ვფიქრობ, რომ ეს ლოგიკური პასუხი იყო იმ სიაზე, რაც საქართველოდან გაიგზავნა“. ახალგაზრდა იურისტთა ასოციაციის თავმჯდომარე, ევროოპის ადამიანის უფლებათა სასამართლოში საქართველოს წარდგენილი კანდიდატურების ჩავარდნის მიზეზებს განიხილავს. ამის შესახებ ანა ნაცცვლიშვილმა, „რუსთავი 2“–ზე, გადაცემა „კურიერის“ ეთერში განაცხადა.
„პროცესი ჩატარდა კომისიის ფარგლებში და არა დახურულ კარს მიღმა. ეს არ იყო გათვალისწინებული, თუმცა მას შემდეგ, რაც რამდენიმე ქვეყნიდან მოსამართლეების სია ჩავიდა სტრასბურგში, სასამართლომ ეს მოთხოვნა თავად დაადგინა, რომ ქვეყნის შიგნით, ეროვნულ დონეზე, შერჩევის პროცესი უნდა იყოს გამჭვირვალე და ინკლუზიური. სტრასბურგის წინა მოსამართლე საქართველოდან,დახურულ კარს მიღმა შეირჩა, ის მაშინდელი გენერალური პროკურორის მიერ იყო გაგზავნილი.
მთავრობა არ შეეწინააღმდეგა ამ პრინციპს და შექმნა სპეციალური კომისია. მასში არასახელისუფლებო აქტორები ვიყავით უმცირესობაში. კომისიის მუშაობა წარიმართა ცუდად, მას ჰქონდა პრობლემები, ხარვეზები. შეუძლებელია ხარვეზიანი პროცესით ჯანსაღი შედეგი დამდგარიყო. ეს ქვეყნის იმიჯისთვის არასასურველი ფაქტია, მაგრამ ახლა უნდა მოვიქცეთ, როგორც ზრდასრული ადმიანები. ვაღიაროთ, რომ იყო პრობლემა, არ ჩავდგეთ თავდაცვით პოზიციაში და გავაკეთოთ უკეთესი პროცესი. ჩვენ გვქონდა სურვილი, რომ პრობლემა აქვე მოგვარებულიყო და სტრასბურგიდან არ მოგვსლოდა არასასიამოვნო მესიჯი. სამწუხაროა, რომ ხელისუფლებამ სამოქალაქო საზოგადოების პოზიცია არ გაითვალისწინა,“–განაცხადა ანა ნაცვლიშვილმა.
მანანა ღოღობერიძე