„დროში შეზღუდულები ვართ, ადგილობრივ არჩევნებამდე სულ რამდენიმე თვეა დარჩენილი. თუმცა ამ არჩევნებზე როგორი შედეგიც არ უნდა დავდოთ, ის მომავალში მხოლოდ გაუმჯობესდება. მჯერა, რომ ჩვენ მოვახერხებთ ადგილობრივი თვითმმართველობის არჩევნებზე ღირსეული შედეგის ჩვენებას“. ამის შესახებ პარტია „მოძრაობა თავისუფლებისთვის–ევროპული საქართველოს“ ერთ–ერთმა ლიდერმა, დავით ბაქრაძემ, „რუსთავი 2–ზე“, გადაცემა „კურიერის“ ეთერში ისაუბრა.
„დღეს ქართულ პოლიტიკაში არის ძალიან სერიოზული ვაკუუმი. თუ ჩვენ გადავხედავთ ბოლო არჩევნებს, დავინახავთ, რომ მოსახლეობის ნახევარი ან ნახევარზე მეტი, სტაბილურად არ დადის არჩევნებზე. ამის მიზეზი არის ის, რომ ჩვენს მოსახლეობას არ მოსწონს დღევანდელი ხელისუფლება და „ქართული ოცნება“, რომელმაც ქვეყანა გააღარიბა. ქვეყნის ეკონომიკური სიტუაცია წავიდა უკან და ოჯახები ცხოვრობენ უარესად. აქამდე ჩვენი მოსახლეობა ვერ ხედავდა რეალურ ალტერნატივას ოპოზიციურ მენიუშიც.
ჩვენი პარტიის საბოლოო ფორმირებით, ჩვენს ქვეყანაში შესაძლებელია წინსვლა. არ ვაპირებთ არც წარსულში ქექვას, არც დისკუსიებში შესვლას ყოფილ თანაგუნდელებთან. ჩვენი ამოცანაა ვისაუბროთ იმაზე, რაც აწუხებს ხალხს.ამ გზაზე მზად ვართ ვიყოთ მოკავშირეები, არა მხოლოდ „ნაციონალურ მოძრაობასთან“, არამედ ყველა იმ პოლიტიკურ პარტიასთან, ვინც საქართველოს მომავალს ხედავს, როგორც ევროპული, თავისუფალი ქვეყნის მომავალს. ჩვენი კონკურენტი არის მხოლოდ „ქართული ოცნება“. არ ვაპირებთ ვიყოთ არც მე–2, არც მე–5 და არც 25–ე გუნდი ქართულ პოლიტიკაში. ჩვენი თვითმიზანი ხელისუფლების ლანძღვა არ არის,“–განაცხადა დავით ბაქრაძემ.
მანანა ღოღობერიძე
