„ეს უწყება იქნება განთავსებული არა მხოლოდ ერთ ადგილას, არამედ მას ექნება წარმომადგენლობები მთელი ქვეყნის მასშტაბით. უფრო მასშტაბურად მოხდება წვდომა ჩვენს პირად ინფორმაციაზე“.ამის შესახებ ორგანიზაცია „საერთაშორისო გამჭვირვალობა–საქართველოს“ აღმასრულებელმა დირექტორმა, ეკა გიგაურმა, „რუსთავი 2“–ზე, გადაცემა „კურიერის“ ეთერში ისაუბრა.
„საკონსტიტუციო სასამართლომ თქვა, რომ ჩვენს პერსონალურ ინფორმაციაზე პირდაპირი წვდომა არ უნდა ჰქონდეს საგამოძიებო უწყებებს. ეს იყო საერთაშორისო სტანდარტი, რომელიც საკონსტიტუციო სასამართლომ გაითვალისწინა. საბოლოოდ მივიღეთ, რომ საპარლამენტო უმრავლესობამ წარმოადგინა კანონპროექტი, რომლის მიხედვითაც უწყება,რომელსაც ექნება პირდაპირი წვდომა მობილურ ტელეფონებში დარჩენილ ინფორმაციაზე, კვლავ იქნება სუს–ის შემადგენლობაში. საკონსტიტუციო სასამართლოს გადაწყვეტილების იგნორირება ხდება. პარლამენტმა შესაძლოა უბრალოდ თქვას, რომ არ მოწონს ეს გადაწყვეტილება. ფაქტობრივად სახელმწიფო წყობა დგება კითხვის ნიშნის ქვეშ.
მნიშვნელოვანი საკითხი, რაც ჩვენმა საზოგადოებამ უნდა იცოდეს, არის ის, რომ, ფაქტობრივად, აქ იქმნება ე.წ. მონსტრი, რომელსაც ექნება არა მხოლოდ ის უფლებამოსილებები, რომელიც ამ უწყებას გააჩნია, არამედ უფრო მეტი. ვიღებთ საბჭოური ტიპის სისტემას და მისი მთავარი მიზანია აკონტროლოს მოქალაქეები,“–განაცხადა გიგაურმა.
მანანა ღოღობერიძე
