„ვიღაცებმა ისინი წააქეზეს, რომ თუ აქციას მოაწყობენ, პირს ამოიკერავენ, ამით ჩვენზე ზეწოლას მოახდენენ. ყველაფერი იქნება ისე, როგორც არის კანონით გათვალისწინებული. არავინ მივა მათთან, თუ კანონით არ ევალება“. ამის შესახებ დევნილთა და განსახლების მინისტრმა, სოზარ სუბარმა, „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„ზუგდიდში ხდება მარტივი რამ, აშენდა ორი კორპუსი, რომელშიც 144 ბინაა და კიდევ შენდება. ეს ბინები ნაწილდება, მიღებული გვაქვს 3 ათასზე მეტი განაცხადი. რამდენიმე ნგრევად ობიექტს ვხურავთ. მონიტორინგი დაწყებულია და კიდევ გაგრძელდება დაახლოებით ორი კვირის განმავლობაში. პრეტენზიები მოსმენილი გვაქვს, დიალოგი შედგა და კიდევ მილიონჯერ მოვისმენთ. თუმცა ზეწოლით არც ერთ ნაბიჯს არ გადავდგამთ. ისინი ცხოვრობენ ისეთივე მძიმე პირობებში, როგორშიც სხვა. როდესაც 3 ათასი ოჯახი არის მძიმე პირობებში და გაქვს მხოლოდ 144 ბინა გასანაწილებელი, უნდა შეარჩიო ის, ვინც ყველაზე მძიმე პირობებშია. ხმაურით და ზეწოლით არ გავნაწილებთ არც ერთ ბინას, ამაში ვიქნები კატეგორიული.
რეფორმა გასატარებელია, თუმცა ეს არ არის მხოლოდ ჩემი გადაწყვეტილება. დევნილთა მთლიანი შემწეობები არის 250 მილიონი . 5 წლის წინ ეს თანხა იყო ნახევარი. რომ შევადაროთ მთლიანად სამხარეო ცენტრების ბიუჯეტი არის 163 მილიონი, ამ ფონზე კი დევნილთა დახმარებაზე 250 მილიონი იხარჯება. ეს რა თქმა უნდა ცოტაა, თუმცა მისი გამოყენება უფრო ეფექტურად შეიძლება. 2003 წლიდან მოყოლებული, საერთაშორისო და არასამთავრობო ორგანიზაციები ითხოვბენ ხელისუფლებისგან, სტატუსიდან, დაფუძნებულ დახმარებაზე გადასვლას. დევნილი დახმარებას უნდა იღებდეს არა იმიტომ, რომ სტატუსი აქვს, იმიტომ, რომ მას უჭირს.
„ნაციონალურ მოძრაობას“ არ აქვს უფლება დევნილებზე ისაუბროს. თუ მაინც აინტერესებთ, ჩავიდნენ ფოცხოეწერში და მათ მიერ ძალით გაყრილ ადამიანებს ელაპარაკონ. როცა ტერიტორიული მთლიანობის აღდგენაზე ლაპარაკობენ, ჩავიდნენ კოდორის ხეობაში, ძალად რომ ჩააბარეს. თუნდაც ჩავიდნენ ახალგორში, დიდი და პატარა ლიახვის ხეობაში. 2008 წელს მათი ქმედებების შდეგია, რომ ეს ტერიტორიები არა მხოლოდ ოკუპირებულია, ყოველდღიურად ნაბიჯი იდგმება ახალი ანექსიისკენ. პარლამენტში მისვლა კანონით არის განსაზღვრული და მოვიქცევი ისე, როგორც კანონი მავალდებულებს,“-განაცხადა სოზარ სუბარმა.
მანანა ღოღობერიძე
