რძის და ხორცპროდუქტები, ტკბილეული, კვერცხი, სასმელები და სხვა სახის პროდუქტი მაღაზიებში გაძვირდა. ფასების გაზრდა იგეგმება სხვა სახის პროდუქტებზეც.
ეს ცვლილება უკვე კარგად აისახა, ხალხის ეკონომიკურ მდგომარეობასა და მაღაზიაში უეცრად მომატებულ ფასებზე. წინა თვეებთან შედარებით, მაღაზიები ქართულ პროდუქციას მომატებული ფასებით იღებენ. ახალი წლის შემდეგ “სანტეს” რძის ნაწარმში 10-20 თეთრით მეტის გადახდა უწევთ. 10-20 თეთრით მოიმატა “ბარამბოსა” და “ტკბილი ქვეყნის” ზოგიერთი პროდუქციის ფასმაც. 20-20 თეთრით მოიმატა ყავა “ჩერის” სხვადასხვა სახეობამ. მაიონეზი “სლობოდა” კი, რომელიც 1,60 ლარი ღირდა, მის მაღაზიაში ახლა 1,90 ლარად იყიდება. ასე რომ, გარდა ექსპორტირებული პროდუქციისა, როგორც ვხედავთ, ფასებმა მოიმატა ქართულ პროდუქტზეც. „თბილისი თაიმსი“ დაუკავშირდა სხვადასხვა ქართულ კომპანიას იმის გასარკვევად, უახლოეს თვეებში არის თუ არა მოსალოდნელი პროდუქტზე ფასების კვლავ მატება.
კომპანია „ბარამბოსა“ და „ტკბილ ქვეყანაში“აცხადებენ, რომ ფასების ზრდა, ლარის კურსის ცვლილებამ გამოიწვია დოლართან მიმართებით.
„გაძვირება გამოიწვია რეალურად ლარის კურსის ვარდნამ. მოგეხსენებათ, ჩვენ 80%-მდე სხვადასხვა ნედლეულის იმპორტირებას ვახორციელებთ. იქიდან გამომდინარე, რომ ლარის კურსი არაა მყარი დოლართნ მიმართებით და ჩვენ ნედლეულს ვყიდულობთ დოლარში, სწორედ ამის გამო ჩვენი პროდუქტის ფასი გაიზარდა. თუ ლარის კურსი შენარჩუნდება, უახლოეს მომავალში არ იგეგმება „ბარამბოს“ პროდუქციაზე ფასების ზრდა. ხოლო თუ კიდევ გაგრძელდება ლარის გაუფასურება, შესაბამისად ჩვენ ვერ გავექცევით ფასების გაზრდას. დოლარის კურსიდანაა გამოწვეული ის ცვლილება, რაც ამჯამად ჩვენი პროდუქციის ფასებზე აისახა.“ – აცხადებენ „ბარამბოში“
რაც შეეხება კომპანია „ტკბილი ქვეყანას“ არც მათ აქვთ წინასწარი ინფორმცია მოიმატებს თუ არა ფასები უახლოეს მომავალში. თუმცა აცხადებენ, რომ თუ ლარის კურსი შეინარჩუნებს დღევანდელ ნიშნულს, არ უნდა ველოდოთ ფასების ცვლილებას.
„ამის შესახებ წინასწარი პროგნოზი თითქმის შეუძლებელია. რადგან, ეს დამოკიდებულია დოლარის კურსზე. თუ იქნება სტაბილურად ლარის კურსი, ფასები აღარ მოიმატებს.“
როგორც ცნობილი „სანტე“ პროდუქციას ქართული რძისგან ამზადებს, ასე რომ მათ არ სჭირდებათ ნედლეულის იმპორტი. საინტერსოა, რამ გამოიწვია კომპანიის ფასების ზრდა. კომპანია „სანტემ“, „თბილისი თაიმსთან“ საუბრისას აღნიშნა, რომ ამ ეტაპზე მათ არ სურთ განცხადების გაკეთება ამ საკითხთან დაკავშირებით.
კომპანიების პასუხების მიუხედავად დღეს ძალიან მძიმე მდგომარეობაა მოსახლეობაში. არასამთავრობო ორგანიზაცია OXFAM-ის კვლევის შედეგების თანახმად, ყოველ მესამე ოჯახს საქართველოში სურსათის საყიდლად საკმარისი ფული არ აქვს. ამასთან, ოჯახების დიდი რაოდენობა საკვებ პროდუქტს დროდადრო კრედიტით ყიდულობს.
როგორც კვლევაშია ნათქვამი, საქართველოში ოჯახების საშუალო თვიური შემოსავალი 575 ლარს შეადგენს და თითქმის ნახევარი ყოველ თვე საკვებზე იხარჯება (საშუალოდ საკვებზე იხარჯება 270 ლარი თვეში).
გარდა ამისა, დაბალშემოსავლიანი ოჯახები საკვებ პროდუქტებზე თავისი შემოსავლის 65%-ს ხარჯავენ (შემოსავალი – 219 ლარი, საკვებ პროდუქტებზე ხარჯი – 142 ლარი), ხოლო მაღალშემოსავლიანი ოჯახები შემოსავლის მხოლოდ 35%-ს ხარჯავენ საკვებ პროდუქტებზე (შემოსავალი – 1421 ლარი, საკვებ პროდუქტებზე ხარჯი – 492 ლარი).
„თბილისი თაიმსმა“ გამოიკითხა რამდენიმე ადამიანი იმასთან დაკავშირებით, აქვთ თუ არა მათ საკმარისი თანხა სურსათის შესაძენად.
ნინო (71 წლის, პენსიონერი) – „ ფასების მომატებასთან ერთად, ცხოვრება გაცილებთ უარესი გახდა, ვიდრე ეს იყო რამდენიმე წლის წინ. პენსია ასოთხმოცი ლარი მაქვს და ეს ფული როგორ უნდა მეყოს საჭმელშიც, საკვებშიც და გადასახადებშიც. ძალიან მძიმე მდგომარეობაა დღეს, საყოფაცხოვრებო, ყველაზე საჭირო საკვების ყიდვისთვისაც აღარ მრჩება ფული.“
თამარი (49 წლის, პედაგოგი) – „ჩემი ყოველი დილა იწყება იმაზე ფიქრით, თუ რა პროდუქტი ვიყიდო, რომ ფული ყველაფრისთვის გავანაწილო. დღეს ყველას ძალიან უჭირს, მწვანილის ფასებმაც კი მოიმატა. ძალიან ბევრ რაღაცაზე გვიწევს უარის თქმა, ისეთ საჭირო საკვებზე, რომლებიც აუცილებელია ჯანმრთლობისთვის.“
ანა (24 წლის) -„ ეს საკითხი ძალიან მაწუხებს. ფასებს ვეღარ ვეწევი, ისეთი სისწრაფით იზრდება. პატარა ბავშვები მყავს და მათ ხომ მაინც უნდა ვუყიდო საჭირო პროდუქტები, რომლებიც აუცილებელია მათი ორგანიზმისთვის. თვეში ერთხელ ძლივს ვახერხებთ ხორცის ყიდვას, ტკბილეულზე ხომ ლაპარაკიც ზედმეტია.“
დღევანდელი რეალობა ასეთია. საკვებზე გაზრდილი ფასები, საზოგადოების დიდ ნაწილზე უარყოფითად აისახა. მათ სამარისი თანხა არ რჩებათ საყოფაცხოვრებო პროდუქტის შესაძენად. ცხოვრების პირობების გაუარესების მიზეზად კი ერთადერთი მიზეზი სახელდება-ლარის გაუფასურება.
მარიამ ლეკიაშვილი
