საქართველოს ეკონომიკისა და მდგრადი განვითარების მინისტრმა გიორგი კვირიკაშვილმა “ლონდონის საფონდო ბირჟის ჯგუფის” (London Stock Exchange Group) გლობალური განვითარების ბაზრის ინფრასტრუქტურის განყოფილების უფროსი, ანტონელა ამადეი მიიღო.
ეკონომიკის სამინისტროს ინფორმაციით, შეხვედრაზე საუბარი საქართველოს საფონდო ბაზრის განვითარების შესაძლებლობებსა და ამ კუთხით “ლონდონის საფონდო ბირჟის ჯგუფთან” თანამშრომლობას შეეხო.
“ლონდონის საფონდო ბირჟის ჯგუფი” ქვეყნის ფინანსური ბაზრის განვითარების მიზნით მიესალმება საქართველოსთან, როგორც შესაძლო სტრატეგიულ პარტნიორთან თანამშრომლობას. აღინიშნა, რომ მნიშვნელოვანია “ლონდონის საფონდო ბირჟის ჯგუფის” გამოცდილებისა და ექსპერტული რჩევების გაზიარება საქართველოს კაპიტალის ბაზრის ინფრასტრუქტურის განვითარების მიმართულებით.
საქართველოს ეკონომიკისა და მდგრადი განვითარების მინისტრის გიორგი კვირიკაშვილის განაცხადებით, ფინანსური ბაზრის განვითარება საქართველოს მთავრობის პრიორიტეტთა შორის ერთ-ერთი უმთავრესია.
კვირიკაშვილი მიესალმება “ლონდონის საფონდო ბირჟის ჯგუფის” დაინტერესებას ითანამშრომლოს ქართულ მხარესთან.
ბრიტანული London Stock Exchange Group საფონდო ბირჟისა და ფინანსური ინფორმაციის კომპანიაა, რომლის სათავო ოფისი ლონდონში მდებარეობს. კომპანია 1801 წელს ლონდონში დაარსდა.
“ლონდონის საფონდო ბირჟის ჯგუფი” (London Stock Exchange Group) იტალიის საფონდო ბირჟის (Borsa Italiana) და ლონდონის საფონდო ბირჟის მფლობელია.
04.09.13
