„ფარული საგამოძიებო მოსმენების დროს მოქალაქე არის პრაქტიკულად დაუცველი. მას არ აქვს შესაძლებლობა, რომ იცოდეს მის პირად სივრცეში შეჭრა.საპოლიციო სექტორის, შსს–ს მხრიდან ყველა ფარული ინფორმაციის მოპოვება უნდა იყოს გაკონტროლებული“. ამის შესახებ პერსონალურ მონაცემთა დაცვის ინსპექტორმა, თამარ ქალდანმა, ტელეკომპანია „იმედზე“, გადაცემა „ქრონიკის“ ეთერში ისაუბრა.
„მიუხედავად იმისა, სად იქნება განთავსებული მთავარი გასაღები, ჩვენ ყოველთვის ხაზს ვუსვამდით,რომ ეფექტური კონტროლი არის რისკების დამზღვევი გარანტია.სახელმწიფოს ვალდებულებაა უზრუნველყოს, რომ ასეთი ტიპის შეჭრა მოხდება მხოდლო სასამართლოს გადაწყვეტილებით და იქნება მკაცრად გაკონტროლებული.
მნიშვნელოვანია კონტროლის ეფექტურობა. პარლამენტის წინაშე იდგა მნიშვნელოვანი ამოცანა,რომელიც საკონსტიტუციო სასამართლომ განსაზღვრა. ერთ–ერთი ასპექტი ეხებოდა ეფექტურ კონტროლს და იმას, რომ არც ერთი სფერო არ უნდა დარჩენილიყო, ერთი მხრივ სასამართლო კონტროლის და მეორე მხრივ, ეფექტური ზედამხედველობის გარეშე. ამ მიმართულებით ჩვენც გვაქვს წინადადებები და საპარლამენტო განხილვების პროცესში წარვადგენთ. ინსპექტორის კონტროლის გარდა, იმ სფეროებზე, რომლებიც მანდატს მიღმა არის კანონმდებლობიდან გამომდინარე, როგორიც არის კონტრდაზვერვა, მნიშვნელოვანია კონტროლის ეფექტურობა,“–განაცხადა თამარ ქალდანმა.
მანანა ღოღობერიძე