„კონსულტაციებისთვის მოწოდება მხოლოდ მოსმენების კანონს არ შეეხება. ჩვენი მხრიდან არის მაღალი ინტერესი, გვაქვს არა ერთი კითხვა, თუმცა კონსულტაციებზე უარი მივიღეთ. სწორედ ეს არის საფუძველი კიდევ ერთი და არა ერთადერთი, რომ ვივარაუდოთ, უმრავლესობა მიდის თვითიზოლაციისკენ“. ამის შესახებ პრეზიდენტის ადმინისტრაციის ხელმძღვანელმა, გიორგი აბაშიშვილმა, „რუსთავი 2“–ზე, გადაცემა „კურიერის“ ეთერში ისაუბრა.
„თვითიზოლაციისკენ სწრაფვა არ არის კარგი არც ქვეყნისთვის და არც ამ პოლიტიკური გუნდისათვის. ბევრი მაგალითია ასეთი თვითიზოლაციის და კარგად არც ერთი მათგანი დასრულებულა.მთელი ეს პერიოდი პრაქტიკულად ხდებოდა არა კონსულტაციების რეჟიმში ყოფნა, არამედ, ერთპიროვნულად, ჩაკეტილ წრეში გადაწყვეტილებების მიღება და ჩვენ ამის შედეგს ყოველთვის მომავალში ვიმკიდით.
მთელი ეს პერიოდი ვკარგავდით დროს, ენერგიას და ფინანსურ რესურსს. სამწუხაროდ, მთავარი პრინციპი არის კვლავ ის, რომ უმრავლესობა თვლის, რომ მას აქვს მონოპოლია ჭეშმარიტებაზე. ასე თვლიდა წინა პარლამენტის უმრავლესობაც. ეს არის მთავარი პრობლემა პოლიტიკური ძალისთვის. ქვეყნისთვის მნიშვნელოვანი გადაწყვეტილებები უნდა მიიღებოდეს კონსულტაციების გავლით, საუბრით, რომ მივიღოთ საუკეთესო პროდუქტი,” – განაცხადა გიორგი აბაშიშვილმა.
წამყვანის კითხვაზე, დაადებს თუ არა საქართველოს პრეზიდენტი ვეტოს ე.წ მოსმენების კანონპროექტს, გიორგი აბაშიშვილმა განაცხადა, რომ გიორგი მარგველაშვილმა ეს თავად უნდა გადაწყვიტოს.
მანანა ღოღობერიძე