„ეს კანონპროექტი თვეების განმავლობაში მზადდებოდა, არანაირ სიჩქარეზე და ფორსირებულ განხილვაზე საუბარი არ არის სწორი. ჩვენ გვაქვს საკონსტიტუციო სასამართლოს მიერ დადგენილი ვადა“. ე.წ მოსმენების შესახებ კანონპროექტის განხილვის პროცესზე, პარალმენტის თავმჯდომარის პირველმა მოადგილემ, თამარ ჩუგოშვილმა, „რუსთავი 2“–ზე, გადაცემა „კურიერის“ პირდაპირ ეთერში ისაუბრა.
„როდესაც მოქმედი კანონი გაუქმდება და ამ დღისთვის ახალი კანონი უნდა იყოს ძალაში შესული, ეს არის 31 მარტი. თარიღის შეცვლა არ იგეგმება. თუ ამ რიცხვისთვის ქვეყანას კანონი არ ექნება, შესაძლოა სერიოზული საფრთხის წინაშე აღმოვჩნდეთ. ვერ ვიტყვით რომ ეს პროცესი იყო ფორსირებული.
უმრავლესობის ინიცირებული ვერსია არის რადიკალურად განსხვავებულ პოზიციებთან შედარებით დაბალანსებული. მოსაზრებების და შენიშვნების ნაწილი გაზიარებულია, სრულად ვერ გავითვალისწინებდით, რადგან ყველა ერთმანეთს ეწინააღმდეგებოდა. არ მესმის რატომ დატოვა ოპოზიციის ნაწილმა სხდომა, მათი მოსაზრებები მივიღეთ და დემონსტრაციული მარშით გასვლა საჭირო არ იყო. კარგი იქნებოდა მეორე მოსმენაზე ისინიც ყოფილიყვნენ.
ეს არის მოცემულობა, რთული საკითხია, სხვადასხვა ინტერესია, რომელიც ერთმანეთთან იკვეთება, ეს არის ისეთი შემთხვევა, როდესაც რომელიმე მხარე ძალიან ბედნიერი და კმაყოფილი რომ იყოს ცვლილებით, ცუდი პროექტი იქნებოდა. ეს ნიშნავს ვიღაცა მეორის ინტერესების ხარჯზე მოხდა,“–განაცხადა თამარ ჩუგოშვილმა.
მანანა ღოღობერიძე
