„შეთანხმების მიზანია, რომ საქართველოს სამართალდამცავი ორგანო დავაახლოვოთ ევროპის სამართალდამცავ ოჯახთან ისე,რომ სამომავლოდ შევძლოთ ინფორმაციის გაცვლა და ტერორიზმის წინააღმდეგ ბრძოლაში თანამშრომლობა საქართველოსა და ევროპის სხვა მოქალაქეების დასაცავად“. ამის შესახებ ევროპოლის დირექტორმა, რობ უენრაითმა „საზოგადოებრივ მაუწყებელთან“ ინტერვიუში ისაუბრა.
„საქართველო არის ევროპული კონტინენტის და ევროპული ოჯახის ნაწილი. იგი კიდევ უფრო მჭიდრო კავშირებს ამყარებს ევროკავშირთან. საქართველოსა და ევროპოლს შორის ოპერატიული თანამშრომლობის შეთანხმება არის კიდევ ერთი წინგადადგმული ნაბიჯი. ჩვენი ამოცანაა ევროპის მოქალაქეებმა თავი უსაფრთხოდ იგრძნონ, დავიცვათ ისინი, ტერორიზმის საფრთხისგან, ორგანიზებული და კიბერდანაშაულისგან. დაჯგუფებები ევროკავშირში შესასვლელად საზღვრებს საქართველოდანაც კვეთენ.
საქართველოს მთავრობას აქვს უნიკალური გამოცდილება მაფიის, ორგანიზებული და კიბერდანაშაულის კონტროლის მხრივ. ტერორიზმის წინააღმდეგ ბრძოლაში საქართველო დებს საკუთარ გამოცდილებას,რომელსაც ჩვენ დავეყრდნობით ორგანიზებული დანაშაულის კვალზე გასასვლელად.
ევროპოლში 2016 წელს ჩამოვაყალიბეთ კონტრტერორისტული ეროვნული ცენტრი. ახლა ისტორიის უმნიშვნელოვანეს ეტაპზე ვართ. გასულ წელს 12 დიდი ტერაქტი ვიხილეთ, ლონდონის და სანკტ–პეტერბურგის ინციდენტებმა დაგვანახა,რომ ჯერ არაფერი დასრულებულა. ეს არის საერთაშორისო ტერორიზმი და საერთო პრობლემა ჩვენს რეგიონში. ყველამ უნდა გავცვალოთ სადაზვერვო ინფორმაცია. გვინდა საქართველო ინტეგრირდეს ძალიან დიდ სამართალდამცავ საზოგადოებაში“ , – განაცხადა რობ უენრაითმა.
მანანა ღოღობერიძე