„იყო რამდენიმე ვერსია შეთავაზებული. დღეს მოქმედი სისტემა მიუღებელია უკვე ყველასთვის და შეიძლება ითქვას, რომ ამ სისტემის დატოვებაზე საუბარი ღიმილისმომგვრელია. ხელისუფლება იძულებული იყო წასულიყო ცვლილებების გზით“. პარლამენტის საკონსტიტუციო კომისიის მუშაობის შედეგზე და საკონსტიტუციო ცვლილებების პროექტზე კომისიის წევრებმა, ვახტანგ ძაბირაძემ და ვახუშტი მენაბდემ საზოგადოებრივ მაუწყებელზე, გადაცემა „რეალური სივრცის“ პირდაპირ ეთერში ისაუბრეს.
„შეთავაზებული იყო რეგიონალურ პროპორციული სისტემა, მე წარვადინე პირადი ინიციატივა, რომელიც სრულიად ამოვარდნილია სისტემიდან. თუმცა, ღრმა უმცირესობაში ვიყავი და ამ იდეის სერიოზული განხილვა აღარ მომხდარა. განხილვები იყო,თუმცა ახლაც არ ვიცი რაღაც თემებზე შევთანხმდით თუ არა. ხელისუფლებამ წარმოადგინა ის ვერსია, რომელიც დღეს არის, მაგრამ ერთი განსხვავებით, საუბარია მანდატების განაწილებაზე. დღეს პარლამენტში-20 %, 30 გაუნაწილებელი მანდატია და ისინი ხელისუფლების ინიციატივით, უმრავლესობას უნდა ერგოს“.
საკონსტიტუციო ცვლილებების პროექტზე გადაცემაში ვახუშტი მენაბდემაც ისაუბრა.
„ვენეციის კომისიის ვიზიტი დაემთხვა იმ პერიოდს, როდესაც შეხვედრების მესამე რაუნდი იმართებოდა. ვვარაუდობ,რომ კომისიას გადაეგზავნა წინასწარი დოკუმენტი, რომ ის ვიზიტისას საქმის კურსში ყოფილიყო. კომისიაში რამდენიმე ათეული ალტერნატიული წინადადება გაიგზავნა. შემოთავაზებული სისტემა აუმჯობესებს არსებულს, თუმცა ის ვერ გადაჭრის პრობლემებს. ეს საარჩევნო სისტემა უსამართლოა იმიტომ, რომ პარლამენტში მხოლოდ და მხოლოდ კარგად დაფინანსებული პოლიტიკური ელიტების მოხვედრის შანსს იძლევა“ , – განაცხადა ვახუშტი მენაბდემ.
მანანა ღოღობერიძე
