“მეორე ტურში იქნება კონფლიქტი ლიბერალურ ელიტებს და ნაციონალისტებს შორის. თუმცა, რამდენად არის ემანუელ მაკრონის ფიგურა მზად, რომ უპასუხოს ევროპის წინაშე ასებულ პრობლემებს, ძნელი სათქმელია”. საფრანგეთის საპრეზიდენტო არჩევნების შესახებ პოლიტიკის ექსპერტმა ბაქარ ბერეკაშვილმა ტელეკომპანია “იმედზე”, გადაცემა “ქრონიკის” ეთერში ისაუბრა.
“პირველი ტურის შედეგები მემარჯვენე პოპულიზმის მზარდ ტენდენციას ადასტურებს საფრანგეთში და ზოგადად ევროპაში. 10 წლის წინ მარინ ლე პენის ასეთი წარმატება აბსურდი შეიძლება ყოფილიყო. ეს არის დემოკრატიის, ნეოლიბერალური წესრიგის კრიზისი. ემანუელ მაკრონის მეორე ტურში გასვლა მოსალოდნელი იყო, მასზე მუშაობენ კულტურული ელიტები, მისი პროპაგანდა დაფუძნებული იყო იმ ღირებულებებზე, რომელიც ჯერ კიდევ მოქმედებს ევროპაში.
თავად მაკრონიც იმ ელიტების ნაწილია, რომლებმაც ევროპაში კრიზისი შექმნეს. ამით სარგებლობს ლე პენი და ცდილობს მანიპულირება მოახდინოს მოსახლეობაზე. ძირითადი ინტერესი არის ის, რომ ლე პენი არის ევროსკეპტიკოსი და შეეცდება სოციოპოლიტიკური პროცესი შეცვალოს, ეს იქნება გარდამტეხი ნაბიჯი ევროკავშირისთვის, რომელიც საფრანგეთის გარეშე წარმოუდგენელია. ლე პენი რუსეთთან ურთიერთობის ნორმალიზაციასაც აპირებს” , – განაცხადა ბაქარ ბერეკაშვილმა.
მანანა ღოღობერიძე
