“ამ ხელისუფლებასაც შეეყარა დაავადება, რომ ისინი უნდა იყვნენ მუდმივები. ამ კონსტიტუციით ქვეყანას ისევ უბიძგებენ რევოლუციური განვითარებისკენ”. ამის შესახებ პოლიტიკის ექსპერტმა გია ხუხაშვილმა “ტვ პირველზე”, გადაცემა “დიანა ტრაპაიძის დღის ამბების” ეთერში ისაუბრა.
“მთავარი თემა არის ქვეყანაში პოლიტიკური კრიზისების პრევენცია. უნდა მოხდეს კონკურენტული პოლიტიკური პროცესის ორგანიზება, რაც ყოველთვის იყო რევოლუციების წინაპირობა.მეორე ფაქტორი არის ინსტიტუტების ურთიერთდამოკიდებულება და ბალანსი იმისათვის, რომ არ მოხდეს ძალაუფლების უზურპაცია. ამ თემაზე ეს კონსტიტუცია არა თუ კარგი არ არის, სერიოზულ რისკებს აჩენს.
ახალი ჩანაწერი პრეზიდენტის არჩევის წესზე, არის მიხეილ სააკაშვილის ოცნება. მან თავის დროზე ორი ვადით გაპრეზიდენტების შემდეგ ძალაუფლების ძირითადი ნაწილი გადაიტანა პრემიერის კომპეტენციაში იმ პერსპექტივით, რომ თავად გახდებოდა პრემიერი და მოახერხებდა მართვადი პრეზიდენტის არჩევას. თუმცა, მასაც კი არ უოცნებია, რომ ისეთი კონსტიტუცია შეექმნა, რითაც პრეზიდენტს საერთოდ გაანულებდა. ეს მოდელი სააკაშვილმაც ვერ გაბედა დემოკრატიულობის ფასადის შესანარჩუნებლად. ხელისუფლებამ ფაქტობრივად ეს თამაში დაასრულა.
საარჩევნო სისტემის ცვლილება სამი კომპონენტისგან შედგება, ბარიერი არ დაწიეს, მეორე კომპონენტია, რომ ბლოკები აღარ უნდა იყოს და ნაშთები მიაქვს პირველ ადგილზე გასულ პარტიას. ჩვენ გვეყოლება ბარიერგადაულახავი 30 პარტია, ნაშთები იქნება უფრო მეტი, ვიდრე პირველ ადგილზე გასული პარტიის შედეგი, ისევ საკონსტიტუციო უმრავლესობას მივიღებთ, ამის სტაბილურობით ახსნა აბსურდია. ნაშთები პირველ ადგილზე გასულ პარტიას არასოდეს არ მიჰქონდა” , – განაცხადა გია ხუხაშვილმა.
მანანა ღოღობერიძე
