“ოპოზიციის მხრიდან ძირითადი თავდასხმის ობიექტი არის ძალოვანი უწყებები, ეს ის ჯაჭვია, რომელშიც სოსო გოგაშვილის მიმართაც ხდებოდა ბრალდებები და საბოლოოდ ჩემამდე მოვიდნენ”. ამის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა ტელეკომპანია “იმედზე”, გადაცემა “ქრონიკის” ეთერში ისაუბრა.
“დანაშაულებრივ ფაქტთან ჩემს შვილს არც გუშინ ჰქონია კავშირი და არც დღეს აქვს. აქ საუბარია ავტომობილზე, რომელზეც აღმოჩენილი ანაბეჭდებიც ეკუთვნის ჩემი შვილის ბავშვობის მეგობარს და მასთან ერთად ჩემი შვილი ხშირად გადაადგილდებოდა. ეს ამორალური, უმსგავსო ქმედება ჩაიდინა “ნაციონალურმა მოძრაობამ”, დაიწყეს მტკიცებით ფორმაში საუბარი.
ეს იყო ჩვეულებრივი სტანდარტი, რასაც სამართალდამცველები არ მიყვნენ, ამ ყველაფრის შეთითხვნა დაიწყო “ნაციონალურმა მოძრაობამ”, ეს მათი მრწამსია. მე პირადად ვერ მიბედავენ, რომ პოლიტიკურად დამიპირისპირდნენ და ჩემს შვილს შეეხნენ. თუ ამ სტანდარტს დავამკვიდრებთ,რომ თუ პოლიტიკოსს ვერ ერევი, მის ოჯახის წევრზე რამე უნდა შეთხზა და ცხოვრება დაუნგრიო, მე ამას კატეგორიულად შევეწინააღმდეგები. სწორედ ამიტომ შევიტანე სარჩელი პროკურატურაში” , – განაცხადა ირაკლი სესიაშვილმა.
მანანა ღოღობერიძე
