რეგისტრაციიდან მოხსნილმა 2053-მა მოქალაქემ პირადობის მოწმობა უფასოდ მიიღო. საცხოვრებელი ადგილის მიხედვით რეგისტრაციიდან მოხსნილი მოქალაქეებისთვის მიმდინარე აქციის შედეგებსა და პირობებზე იუსტიციის სახლში სერვისების განვითარების სააგენტოს თავმჯდომარე ლევან სამადაშვილმა ისაუბრა.
მისი განცხადებით, აქციის ფარგლებში ყველაზე მეტი მოქალაქე თბილისის, ქუთაისის, გორის, ბათუმისა და მარნეულის იუსტიციის სახლებში გამოცხადდა.
“სერვისების განვითარების სააგენტო საარჩევნო სიის ფორმირებაზე მუშაობას განაგრძობს. აღსანიშნავია, რომ აქციის ფარგლებში ყველაზე მეტი მოქალაქე თბილისის, ქუთაისის, გორის, ბათუმისა და მარნეულის იუსტიციის სახლებში გამოცხადდა. საცხოვრებელი ადგილის მიხედვით რეგისტრაციიდან მოხსნილი მოქალაქე თუ ახალ მისამართზე 10 ოქტომბრის ჩათვლით დარეგისტრირდება, პირადობის ახალ მოწმობას უფასოდ მიიღებს, რეგისტრაციის წესის დარღვევისთვის ჯარიმისგან გათავისუფლდება და საარჩევნო სიაში იქნება შეყვანილი”, – აცხადებენ სერვისების განვითარების სააგენტოში.
მათივე განმარტებით, მოქალაქეს გადამოწმება იმისა, მოხსნილია თუ არა რეგისტრაციიდან შეუძლიათ სერვისების განვითარების სააგენტოსა (www.sda.gov.ge) და იუსტიიის სახლის (www.house.gov.ge) ვებგვერდებზე; ასევე, skype-მისამართზე (sda.ge) და ტელეფონის ნომერზე − 240 10 10.
“აქციის მიზანია, საქართველოს ჰქონდეს ზუსტი საარჩევნო სია. აქციის შედეგად, დადგინდება, რეალურად არსებობენ თუ არა ე.წ. რეგისტრაციიდან მოხსნილი პირები და მათი რეგისტრაცია მოხდება თავიდან, ახალი მისამართის მიხედვით. სერვისების განვითარების სააგენტოს მონაცემთა ბაზაში რეგისტრაციიდან მოხსნილია 98 000-მდე პირი, რომელთაც შეუძლიათ ამ აქციით სარგებლობა.
პირი რეგისტრაციიდან იხსნება შემდეგ შემთხვევებში: ფიზიკური პირის განცხადების საფუძველზე, რომელიც დაადასტურებს, რომ რეგისტრაციიდან მოსახსნელი პირი ბოლო ექვსი თვის განმავლობაში კონკრეტულ მისამართზე არ ცხოვრობს; საჯარო რეესტრის ეროვნულ სააგენტოში ბინის ახალი მფლობელი საკუთრების რეგისტრაციისას მოითხოვს ფართის ძველი მესაკუთრისა და აღნიშნულ მისამართზე დაფიქსირებული პირების რეგისტრაციიდან მოხსნას. რაც შეეხება ახალ მისამართზე რეგისტრაციის გავლას, მსურველებს შეუძლიათ, განაცხადი წარადგინონ სერვისების განვითარების სააგენტოს ფილიალებსა და იუსტიციის სახლებში”, – განმარტავენ სააგენტოში.
12.09.13
