ტელეკომპანიებში – “რუსთავი 2″- სა და”იმედში” ასაფეთქებელი მოწყობილობის არსებობის შესახებ ცრუ შეტყობინების ორივე ავტორი დაკავებულია.
ამის შესახებ ინფორმაციას შინაგან საქმეთა სამინისტრო ავრცელებს.
უწყების ცნობით, ორივე მათგანის აყვანა შეტყობინებიდან რამდენიმე საათში მოხდა.
გამოძიება ტერორიზმის შესახებ ცრუ შეტყობინების ფაქტზე, სსსკ-ს 331-ე მუხლის 1-ლი ნაწილით მიმდინარეობს.
“შინაგან საქმეთა სამინისტროს გადაუდებელი დახმარების ოპერატიული მართვის ცენტრ “112”-ში დღეს, 12 სექტემბერს, 13:35 საათზე მორიგი შეტყობინება შევიდა. მოქალაქემ ცენტრის ოპერატორს თბილისში, ლუბლიანას ქ. #5-ში ტელეკომპანია “იმედის” შენობაში ნაღმის არსებობის შესახებ აცნობა. შეტყობინებიდან რამდენიმე წუთში ადგილზე საპატრულო პოლიციის ეკიპაჟები, კრიმინალური პოლიციის თანამშრომლები, გამნაღმველები და კინოლოგები გამოცხადდნენ.
სამართალდამცველებმა უსაფრთხოების მიზნით შენობიდან იქ მყოფი ადამიანების ევაკუაცია მოახდინეს, მიმდებარე ტერიტორია ამკრძალავი ლენტით შემოსაზღვრეს და პერიმეტრი დაიცვეს. გამნაღმველების მუშაობის შედეგად დადგინდა, რომ გამოძახება ცრუ იყო – შენობაში ნაღმი არ აღმოჩნდა. სამართალდამცველებმა ცრუ შეტყობინების ავტორი ზარის განხორციელებიდან რამდენიმე საათში დააკავეს”, – ნათქვამია შსს-ის განცხადებაში.
12.09.13