გუშინ, სტეფანწმინდაში საქართველოს სპორტისა და ახალგაზრდობის საქმეთა სამინისტროს მხარდაჭერით მსოფლიოში ყველაზე ექსტრემალური გუნდური შეჯიბრი – Red Bull GerGetIt – გაიმართა.
Red Bull GerGetIt – ესტაფეტური შეჯიბრია, რომელიც ექსტრემალური სპორტის ოთხი დისციპლინის უნიკალური კომბინაციაა: თითოეული გუნდი შედგება კაიაკერის, მეკლდეურის, სამთო ველოსიპედისტისა და სამთო მორბენალისაგან. მონაწილეები ამავე თანმიმდევრობით გადასცემენ ერთმანეთს ესტაფეტას წინასწარ განსაზღვრულ მარშრუტზე.
აღნიშნული ღონისძიება, საქართველოში წელს პირველად ჩატარდა და დიდი დაინტერესება გამოიწვია. შეჯიბრში მონაწილეობას იღებდნენ გუნდები როგორც საქართველოდან, ასევე სხვა ქვეყნებიდან: თურქეთი, გერმანია, სომხეთი, აშშ და სხვა.
გუნდებს ექსტრემალურ პირობებში უწევდათ ერთმანეთთან მეტოქეობა. საბოლოოდ გამარჯვება მოიპოვა
საქართველოს სპორტისა და ახალგაზრდობის საქმეთა სამინისტროს გუნდმა, რომელმაც ყველაზე ნაკლები დრო მოანდომა მარშრუტის დაძლევას.
საპრიზო ფონდი შეადგენდა 6000 ლარს, საიდანაც 3000 ლარი მიიღო გამარჯვებულმა გუნდმა.
ასევე დაწესებული გახლდათ სპეციალური პრიზები სპონსორებისაგან იმ მონაწილეთათვის, რომლებმაც თითოეულ დისციპლინაში საუკეთესო დროის შედეგები აჩვენეს.
ორგანიზატორების განცხადებით, ღონისძიება მომავალ წელსაც ჩატარდება და უფრო მასშტაბურ სახეს მიიღებს.
15.09.13
