მიხეილ სააკაშვილისთვის უკრაინის მოქალაქეობის ჩამორთმევის საკითხზე ისაუბრა საქართველოში ამერიკის შეერთებული შტატების ელჩმა.
„ეს არის უკრაინის საკითხი, უკრაინის გადასაწყვეტი და ისინი მიუდგებიან შესაბამისად“, – განაცხადა კელიმ. ელჩის განმარტებით, ზოგადად, ამგვარ საკითხებს ამერიკის შეერთებული შტატები უყურებს საერთაშორისო ვალდებულების და საერთაშორისო სამართლის ჭრილში.
„რაც შეეხება მოქალაქეობის ჩამორთმევის საკითხს. ეს არის მიმდინარე სამართლებრივი საქმე და ზოგადად ამ საკითხზე კომენტარს ვერ გავაკეთებთ. რაც შეეხება ამ კონკრეტულ მოქმედებას, ეს არის უკრაინის საკითხი, უკრაინის ქვეყნის გადასაწყვეტი და ისინი მიუდგებიან შესაბამისად”, – განაცხადა იან კელიმ.
აშშ-ის ელჩი ასევე გამოეხმაუარა მიხეილ სააკაშვილის მიერ CNN-ისთვის მიცემულ ინტერვიუსთან დაკავშირებულ შეკითხვას, სადაც ყოფილმა პრეზიდენტმა აღნიშნა, რომ არავის დახმარებას არ ეძებს.
„ნებისმიერი პიროვნება, ვინც მსგავსი საკითხის წინაშე დგას, უნდა დაეყრდნოს სამართლებრივ განხილვას კომპეტენეტური იურისტების დახმარებით, რადგან ეს არის სამართლებრივი საკითხი და ზოგადად ასეთი საკითხები უნდა წყდებოდეს კანონის უზენაესობის ზოგადი პრინციპით“, – ამბობს იან კელი.
26 ივლისს, საქართველოს ყოფილ პრეზიდენტს და უკრაინის ოდესის ოლქის ყოფილ გუბერნატორს, მიხეილ სააკაშვილს უკრაინის საიმიგრაციო სამსახურმა ქვეყნის მოქალაქეობა ჩამოართვა. მიხეილ სააკაშვილმა უკრაინის მოქალაქეობა 2015 წლის 29 მაისს, უკრაინის პრეზიდენტის ბრძანების შემდეგ მიიღო, რის გამოც რამდენიმე თვეში დაკარგა საქართველოს მოქალაქეობა.
უკრაინის პრეზიდენტის პეტრო პოროშენკოს ადმინისტრაციამ სააკაშვილისთვის უკრაინის მოქალაქეობის ჩამორთმევის მიზეზებზე განაცხადა, რომ ეს ინფორმაცია პერსონალურ მონაცემებს შეიცავს და ვერ გაასაჯაროებენ.
