“ქართული ოცნების” თბილისის მერობის კანდიდატმა კახა კალაძემ განაცხადა, რომ თბილისში 500-ზე მეტი “ხრუშჩოვკაა” და ისინი არა ერთბაშად, არამედ თანდათანობით უნდა ჩანაცვლდეს. ამის შესახებ მან “კვირის პალიტრას” უთხრა.
“ამ საქმეში მთავარია ”ხრუშჩოვკებში” მობინადრე მოსახლეობა, რომლებმაც უნდა შექმნან ამხანაგობები. თუ ერთი კორპუსის მობინადრენი გაერთიანდებიან და შეთანხმდებიან, რომ შევიდეს ინვესტორი, სწორედ აქ ამოქმედდება მერიის პროექტი. როგორც ვიცი, მიმდინარეობს მუშაობა რამდენიმე უბანში – ვარკეთილში, საბურთალოზე, მოსახლეობა დაინტერესებულია.
მთავარია, გენგეგმის ფარგლებში საამისოდ როგორი კოეფიციენტი გვექნება. ჩემი ხედვა ასეთია – ქალაქის ცენტრალურ უბნებში კოეფიციენტი არ უნდა გაიცეს. ახლა მორატორიუმია შემოღებული, მაგრამ, ჩემი აზრით, საერთოდ უნდა გავაუქმოთ ცენტრალურ უბნებში კოეფიციენტების გაცემა”, – განაცხადა კახა კალაძემ.
საქართველოში ადგილობრივი თვითმმართველობის არჩევნები 21 ოქტომბერს გაიმართება.
