საქართველოს პრეზიდენტმა გიორგი მარგველაშვილმა 27-ე ეკონომიკურ ფორუმში მონაწილეობის მისაღებად პოლონეთში ქალაქ კრინიცა-ზდრუიში სამუშაო ვიზიტი დაიწყო.
საქართველოს პრეზიდენტი კრინიცას 27-ე ეკონომიკური ფორუმის გახსნაში და საპრეზიდენტო პანელის მუშაობაში პოლონეთის პრეზიდენტთან ანდჟეი დუდასთან და ყოფილი იუგოსლავიის რეპუბლიკის – მაკედონიის პრეზიდენტთან გეორგე ივანოვთან ერთად მიიღებს მონაწილეობას, კონფერენციის დელეგატებს სიტყვით მიმართავს და არაფორმალურ, ღია დისკუსიაში ჩაერთვება.
ეკონომიკური ფორუმი უკვე 20 წელია აღმოსავლეთის ინსტიტუტის ორგანიზებით იმართება. წელს ფორუმი აღმასრულებელი, საპარლამენტო, თვითმმართველობისა და ბიზნესსექტორის წარმომადგენლებს აერთიანებს.
საქართველოს პრეზიდენტი ეკონომიკური ფორუმის ფარგლებში, პოლონეთის რესპუბლიკის პრეზიდენტს ანდჟეი დუდას დელეგაციასთან ერთად შეხვდება და კრინიცა-ზდრუის კონგრესცენტრში საქართველოს დელეგაციასთან ერთად 27-ე ეკონომიკურ ფორუმში მონაწილე მაღალი რანგის სტუმრების გალადაჯილდოების ცერემონიას დაესწრება.
საქართველოს პრეზიდენტი, პოლონეთში საქართველოს ელჩთან ილია დარჩიაშვილთან ერთად, კრინიცას 27-ე ეკონომიკური ფორუმის საკონცერტო დარბაზში ქართულ საღამოზე ფორუმის მონაწილეებს ქართული ნაწარმის გამოფენაზე უმასპინძლებს.
საქართველოს პრეზიდენტი პოლონეთის ეკონომიკურ ფორუმს დელეგაციასთან ერთად დაესწრება, რომლის შემადგენლობაშიც არიან პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, საგარეო ურთიერთობათა მდივანი თენგიზ ფხალაძე, პოლიტიკური მდივანი ფიქრია ჩიხრაძე და საპარლამენტო მდივანი ანა დოლიძე და საქართველოს ელჩი პოლონეთში ილია დარჩიაშვილი.
საქართველოს პრეზიდენტის ადმინისტრაციის უფროსი გიორგი აბაშიშვილი მნიშვნელოვნად აფასებს კრინიცას ეკონომიკური ფორუმის ფარგლებში, პრეზიდენტის ვიზიტისას, ქართული პროდუქციის პოპულარიზაციისათვის მოწყობილ გამოფენას და აცხადებს, რომ აღნიშნული ფორმატის ღონისძიება ქართული პროდუქციის მნიშვნელობის ხაზგასმაა, რაც ძალიან წადგება ექსპორტის ხელშეწყობას.
,,ეკონომიკურ ფორუმზე სხვადასხვა შეხვედრებისას ყურადღება გამახვილდება საქართველოს საინვესტიციო პოტენციალზე და ეკონომიკური კავშირების გაღრმავების მიმართულებით ხელსაყრელ, საქართველოს სტრატეგიულ მდებარეობაზე”, – აღნიშნა გიორგი აბაშიშვილმა.
