საქართველოში ოფიციალური ვიზიტით ევროპაში აშშ-ის საზღვაო ქვეითი ძალების სარდალი გენერალ-ლეიტენანტი რიჩარდ ტრეიონი იმყოფება.
თავდაცვის უწყების ინფორმაციით, დღეს, ამერიკელი სამვარსკვლავიანი გენერალი ეროვნულ სასწავლო ცენტრ „კრწანისს“ ესტუმრა. მას მასპინძლობა საქართველოს შეიარაღებული ძალების გაერთინებული შტაბის პირველმა მოადგილემ, ბრიგადის გენერალმა ვახტანგ კაპანაძემ გაუწია.
სამხედრო მაღალჩინოსნები სამთო-სადაზვერვო ბატალიონის სამხედრო მოსამსახურეების ISAF-ის მისიისთვის მზადების პროცესს დაესწრნენ.
გენერალ-ლეიტენანტი ტრეიონი კმაყოფილი დარჩა ქართველი და ამერიკელი სამხედროების მომზადების დონით.
„ძალიან მნიშვნელოვანია საზღვაო ქვეითების გენერალ-ლეიტენანტის სტუმრობა ჩვენთან. ის ძალიან გამოცდილი გენერალია. მისი საქართველოში ვიზიტის ერთ-ერთი მთავარი მიზანია საკუთარი თვალით ნახოს, თუ როგორ ემზადებიან ქართველი სამხედროები ამერიკელებთან ერთად მისიისათვის ავღანეთში“ – განაცხადა ბრიგადის-გენერალმა ვახტანგ კაპანაძემ.
დღესვე, გენერლები ქართველ და ამერიკელ ინსტრუქტორებს გაესაუბრნენ, რომლებიც ქართველ სამხედროებს ავღანეთში საერთაშორისო მისიისთვის ამზადებენ. მათ ეროვნული სასწავლო ცენტრ „კრწანისი“-ის სიმულაციური ცენტრი და სხვა ინფრასტრუქტურაც დაათვალიერეს.
საქართველოში ვიზიტის ფარგლებში, ასევე დაგეგმილია ევროპაში აშშ-ის საზღვაო ქვეითი ძალების სარდლის შეხვედრები თავდაცვის მინისტრის მოადგილესთან და გაერთიანებული შტაბის ხელმძღვანელ პირებთან.
17.09.13
