29 სექტემბერს „დინამო არენაზე“ მსოფლიო ფეხბურთის ვარსკვლავები ჩამოვლენ, მათ შორის არის ფრანჩესკო ტოტი, პაოლო მალდინი, ანდრეი შევჩენკო, ხავიერ ძანეტი დას ხვები. ისინი საქველმოქმედო მატჩს ითამაშებენ ხანძრის შედეგად დაზიანებული ბორჯომის ტყის აღსადგენად. მატჩში მონაწილეობას კახი კალაძეც მიიღებს. არღვევს თუ არა ფეხბურთის ფედერაცია საარჩევნო კანონმდებლობას, ამის შესახებ ფედერაციის პრეზიდენტმა, ლევან კობიაშვილმა „რეაქციის“ ეთერში ისაუბრა.
„კახი კალაძე მოედანზე იქნება,როგორც ყველაზე ტიტულოვანი ქართველი ფეხბურთელი, მსოფლიო ვარსკვლავი. ჩემთვის წარმოუდგენელია რამე ღონისძიება ჩატარდეს მსგავსი მასშტაბების და იქ არ იყოს კალაძე. ფეხბურთის ფედერაცია არ არის საბიუჯეტო ორგანიზაცია, ჩვენ ბიუჯეტის თანხა არ აგვიღია.
არ არსებობს მსგავსი საქველმოქმედო მატჩი,რომელიც სპონსორების გარეშე კეთდება. ჩვენი სპონსორები არიან „ვი თი ბი“ ბანკი, ლუდი „აისი“, „ემ კვადრატი“ , „თეგეტა მოტორსი“, „ევექსი“. იდეა იყო ფეხბურთის ფედერაციის, მაგრამ არ უარვყოფ,რომ კახა თავისი ურთიერთობებით დაგვეხმარა მეგობრების ჩამოყვანაში. კალაძის გარდა იქნება გიორგი ქინქლაძე, ალექსანდრე იაშვილი, რა თქმა უნდა მეც მივიღებ მონაწილეობას.
საქართველოში ბევრს გულით გაუხარდა,რომ მათი საყვარელი ფეხბურთელი შეუძლიათ მოედანზე ნახონ პირადად. ასეთი ათიათასობით ადამიანია, ვისაც ეს ღონისძიება უხარია. სამწუხაროა,რომ კონკრეტული პირები სხვა ჭრილში განიხილავენ ამ მოვლენას, ეს არაადეკვატური და არასწორია. ზაფხულის პერიოდში,როცა ქვეყანაში მძიმე მდგომარეობა იყო, ფეხბურთის ფედერაციამ დაიწყო საქველმოქმედო ღონისძიებები და ვთქვით, რომ ბილეთებით შემოსულ თანხა მთლიანად ტყის აღდგენას მოხმარდებოდა.
გაჩნდა იდეა,რომ ხომ არ გაგვეკეთებინა უფრო მასშტაბური თამაში, ჩამოგვეყვანა მსოფლიო ვარსკვლავები.დამსწრე ადამიანი თავისთავად კეთილ საქმეს გააკეთებს.ჩვენ პირველ რიგში კეთილ საქმეს ვაკეთებთ და ყველას ვურჩევ იყიდონ ბილეთი, თავი დაანებონ არაადეკვატურ განცხადებებს“, – განაცხადა ლევან კობიაშვილმა.
