2013 წლის პირველი 8 თვის განმავლობაში საქართველოში 3 568 518 მოგზაური შემოვიდა.
ტურიზმის ეროვნული ადმინისტრაციის ხელმძღვანელის, გიორგი სიგუას ინფორმაციით, ეს მაჩვენებელი გასული წლის ანალოგიურ პერიოდთან შედარებით 26%-ით მეტია.
“რვა თვის მონაცემებით თურქეთი განაგრძობს ლიდერობას 1 109 920 საერთაშორისო მოგზაურით, მას მოსდევს დანარჩენი მეზობელი ქვეყნები – სომხეთი 820 043, აზერბაიჯანი 686 671, რუსეთი 515 989. მთლიანობაში მეზობელი ქვეყნებიდან 3 132 623 საერთაშორისო მოგზაური შემოვიდა, რაც მთლიანი რაოდენობის 88 პროცენტს შეადგენს”, – აღნიშნა სიგუამ.
მისივე თქმით, საქართველოს ტურიზმის ეროვნული ადმინისტრაციის მიერ ჩატარებულმა იანვარი – ივლისის კვლევამ აჩვენა, რომ ვიზიტორების უდიდესი ნაწილის მთავარ მიზანს წარმოადგენს გართობა, დასვენება და რეკრეაცია.
“მას მოსდევს მეგობრების და ნათესავების მოსანახულებლად ჩამოსული და ტრანზიტით შემოსული ვიზიტორები. ვიზიტორების უმრავლესობა 40% მარტო მოგზაურობს, 26% ოჯახის წევრებთან ერთად”, – აღნიშნა სიგუამ.
რაც შეეხება აგვისტოს, აღნიშნულ თვეში საქართველომ 770 608 საერთაშორისო მოგზაური მიიღო, რაც, სიგუას თქმით, 28%-ით აღემატება გასული წლის ანალოგიურ პერიოდს.
მისივე თქმით, ყველაზე პოპულარული ტურისტული ადგილი ვიზიტორებს შორის თბილისია, შემდეგ კი ბათუმი და ყაზბეგი მოდიან. სიგუას ინფორმაციით, საქართველოში ვიზიტორების გაწეულმა ხარჯმა 1 703 673 938 ლარი შეადგინა.
გარდა ამისა, სიგუამ დღევანდელ პრესკონფერენციაზე წარმოადგინა პრეზენტაცია, რომელიც ტურიზმის ადმინისტრაციის გაწეულ საქმიანობასა და სამომავლო გეგმებს ეხებოდა.
18.09.13
