სკუტერი გადაადგილების სწრაფი, იაფი და კომფორტული საშუალებაა.რომელიც ნებისმიერ ადამიანს საშუალებას აძლევს დაათვალიეროს ქალაქი, შეიგრძნოს მისი მომხიბლელობა და სილამაზე. ზოგიერთისთვის სკუტერი პობი და ძლიერი ექსტრემია. თუმცა მისი პრაქტიკული დანიშნულება ეჭვს გარეშეა. ეს ძალიან კარგად იცოდნენ ახალგაზრდა მეგობრებმა, რომლებმაც სკუტერების პრაქტიკული გამოყენება დაიწყეს საქართველოში.
გიორგი ფოფორაძე და გიორგი მონავარდისაშვილი ის ახალგაზრდები არიან, რომლებმაც საკუთარი ცხოვრების სტილი მომგებიან ბიზნესს მოარგეს და დღეს საკმაოდ დიდი პოპულარობითაც სარგებლობენ. მათ შექმნეს კომპანია „Scoot Scoot“, რომელიც მომხმარებელს სკუტერების ყიდვასა და დაქირავებას სთავაზობს. „თბილისი თაიმსს“ კომპანიის ერთ-ერთი დამფუძნებელი – გიორგი მონავარდისაშვილი კომპანიის შექმნისა და სამომავლო გეგმების შესახებ ესაუბრა.
ჩვენს მკითხველს რომ მოუყვეთ, საიდან გაგიჩნდათ “Scoot Scoot”-ის შექმნის იდეა?
– მე და ჩემი პარტნიორი ძალიან დიდი ხანია სკუტერით დავდივართ. გარდა ამისა, უცხოეთში მოგზაურობისას ხშირად ვქირაობთ სკუტერებს, რადგან ქალაქის დასათვალიერებლად არაჩვეულებრივი საშუალებაა, არც საცობში გიწევს საათობით გაჩერება და ფეხით სიარულთან შედარებითაც არ იღლები. სწორედ ამიტომ გადავწყვიტეთ, რომ საქართველოშიც შემოგვეყვანა სკუტერები და გაგვეკეთებინა მსგავსი რამ. დაახლოებით ერთი წლის წინ ვიპოვნეთ იაპონური კომპანია, რომლის დახმარებითაც 50 ცალი სკუტერი შემოვიყვანეთ.
რა სახის სერვის სთავაზობთ მომხმარებელს?
– დღეს ორი ძირითადი მიმართულებით ვავითარებთ ჩვენს ბიზნეს, გაქირავებისა და გაყიდვების კუთხით. შემოგვყავს მეორეული იაპონური რეტროსკუტერები, რომლებიც ძალიან კარგ მდგომარეობაშია. ვღებავთ სხვადასხვა ფერით და ვაკრავთ ჩვენ მიერ გაკეთებულ ფერად სტიკერებს. გაქირავების სერვისი ძირითადად ტურისტებზეა მორგებული, რადგან ძალიან მარტივი და კომფორტული საშუალებაა იმისითვის, რომ დაათვალიერონ ქალაქი.
როგორია ფასები და სად შიძლება მათი შეძება?
– ამჟამად „ფაბრიკაში“ გვაქვს პატარა ოფისი. ამიტომ, ნებისმიერ მსურველს შეუძლია მოვიდეს, იქირაოს ან იყიდოს მათთვის სასურველი სკუტერი. ფასები დაახლოებით სხვა კომპანიების ფასების მსგავსია, თუმცა ტექნიკურად და ვიზუალურად ბევრად უფრო მოწესრიგებულ სკუტერებს ვთავაზობთ მომხმარებლებს. სკუტერის ყიდვა შეუძლიათ 1200 ლარიდან 2000 ლარის ფარგლებში. რაც შეეხება ფასებს გაქირავების შემთხვევაში,ერთი დღის ფასი ერთადგილიანი სკუტერის 35 ლარია, ხოლო ორადგილიანის- 50 ლარი. ასევე გვაქვს ქართველ მომხმარებლებზე მორგებული სერვისი, რომლის მიხედვითაც, თუ გადაიხდიან 100 ლარს, მათ ნებისმიერი ოთხი დღის განმავლობაში შეუძლიათ იქირავონ სკუტერი.
როგორია მოთხოვნა და რამდენად კონკურენტულები ხართ ბაზარზე?
– მიუხედავად იმისა, რომ სანამ ქართულ ბაზარზე შემოვიდოდით იყო რამდენიმე კომპანია, რომლებიც დაკავებულები არიან მოტოციკლეტების გაყიდვა-გაქირავებით, ვფიქრობ, წარმატებას მალევე მივაღწიეთ. რამდენიმე მიზეზის გამო, პირველი, ვფიქრობთ, რომ ჩვენ სწორად გათვლილი მარკეტინგული მიზნები გვქონდა, ასვე ჩვენს მომხმარებელს ვთვაზობთ ერთკვირიან გარანტიას, რაც სანდოობის ეფექტს ზრდის. მას შემდეგ, რაც გავჩნდით ქართულ ბაზარზე აბსოლუტურად შეიცვალა დამოკიდებულება სკუტერების მიმართ. დღეს საკმაოდ ბევრი ადამიანი მოდის, ყიდულობს ან ქირაობს სკუტერს. თუ დღემდე მხოლოდ საჭიროებისთვის ან ჰობის გამო ყიდულობდნენ სკუტერებს, დღეს საკმაოდ ბევრი მოყვარული გაჩნდა, რომლებიც უკვე ტრანსპორტირების საშუალებად იყენებს მას.
რამდენად არის დაცული უსაფრთხოება?
– 21 წლამდე მომხმარებლებისთვის არ ხდება სკუტერების გაქირავება. აუცილებლად ვატანთ ჩაფხუტებს. ასევე რაც მნიშვნელოვანია, ვამოწმებთ რამდენად კარგად იცის მართვა და თუ სურვილი აქვთ სკუტერის მართვის სპეციალურ ორდღიან კურსებსაც ვთავაზობთ. შესაბამისად, ამ მხრივ, შედარებით დაცულია უსაფრთხოება.
როგორია თქვენი სამომავლო გეგმები?
– ზამთრის მოახლოებასთან დაკავშირებით, მომხმარებლებს შევთავაზებთ გარკვეულ აქსესუარებს. მაგალითად, სავარძლის გათბობას,სპეციალურ საწვიმარს. იმის გათვალისწინებით, რომ ბაზარზე აქტიურად ორი-სამი თვის წინ გამოვჩნდით, ვფიქრობ, საკმაოდ სწრაფად ვვითარდებით. ვაპირებთ სხვადასხვა სერვისის დამატებას.ასევე მოლაპარაკებებს ვაწარმოებთ სხვადასხვა უცხოურ კომპანიასთან ახალი სკუტერების შემოყვანის თაობაზე.
მარიამ ლეკიაშვილი
