„ბაღლინჯოები რამდენიმე ათეული სახეობა ისედაც არსებობდა საქართველოში, მაგრამ მათ მტაცებლები არეგულირებდნენ. ჯერჯერობით აზიური ფაროსანას ბუნებრივი მტერი არ არსებობს“ , – ამის შესახებ ბიოლოგმა ვასილ გაბუნიამ „ტვ პირველის“ ეთერში ისაუბრა.
„ბუნებრივი პროცესია,როდესაც რეგიონში ჩნდება უცხო, ინვაზიური მავნებელი, მას ბუნებრივი მტერი არ ჰყავს და მარტივად ვრცელდება. მისი რიცხოვნობის შემცირება არ ხდება, მრავლდება უკონტროლოდ. ხელოვნური მტერი არის ქიმიური პრეპარატები და შემდეგ ეტაპზე უნდა მოვძებნოთ ბუნებრივი მტერი იქედან,საიდანაც ის შემოვიდა.
ლიხის ქედი უკვე გადმოლახა, კახეთის და ქართლის რეგიონი თუ იგივე მდგომარეობაში ჩავარდება, რაშიც დასავლეთ საქართველო, ეს იქნება კატასტროფა. ზამთარი მისთვის მარტივი გადასატანია, ჭამს ყველაფერს, წოვს სითხეს ნებისმიერი წვნიანი ბოსტნეულიდან, ხილიდან. ზამთრის პერიოდში როგორც ნებისმიერი ცივსისხლიანი ცხოველი, ისიც ეძებს თავშესაფარს სითბოში, უნდა ველოდოთ სარდაფებში, სახლის ღრიჭოებში.
ისინი გეომეტრიული პროგრესიით მრავლდებიან. ყველაფრის ქიმიკატებით მოწამვლა რომ დავიწყოთ, ფაროსანას გარდა სხვა საჭირო მწერებსაც გავანადგურებთ, ეს ქიმიკატი ფაროსანას და პეპელასა ერთნაირად აღიქვამს და თანაბრად აქრობს“, – განაცხადა ვასილ გაბუნიამ.
მანანა ღოღობერიძე
