თუ ფიქრობთ,რომ „არტ-ლატე“, სხვაგვარად კი ყავაზე მხატვრობა მოდური და ინოვაციური აღარ არის, ცდებით. თქვენ ალბათ, ჯერ არ გინახავთ, სამხრეთ კორეელი ბარმენის ლი განგ ბინის ნახატები,რომელებიც პოპულარული მას შემდეგ გახდა,რაც სეულში საკუთარი კაფე გახსნა და ერთდროულად ყავის და ესთეტიკის მოყვარულებს „არტ-ლატეს“ განსხვავებული კომპოზიციები შესთავაზა.
ფერადი კრემის მეშვეობით, ლი ჩვეულებრივ ყავას ხელოვნების ნიმუშად გარდაქმნის. მან საკუთარ ტექნიკას „კრემ-არტი“ უწოდა.
„ყავა ჩემთვის ზღაპარივითაა. ის მეხმარება ზუსტად გამოვხატო ჩემი ემოციები და სიზმრები რეალობად ვაქციო. ადამიანები, რომლებიც ყავაზე ხატავენ, ძირითადად იყენებენ შავ და თეთრ ფერებს. მე კი მსურდა უფრო მეტი ფერი შემომეთავაზებინა,“- უთხრა CNN-ს ლი განგ ბინმა.
ლის ნამუშევრები ფართო საზოგადოებამ ინსტაგრამის (leekangbin91) მეშვეობით გაიცნო, მას უკვე 200 ათასი გამომწერი ჰყავს.
მისი ნამუშევრებიდან მომხმარებლებში ყველაზე მეტი პოპულარობით ვან გოგის „ვარსკვლავიანი ღამე“, ედვარდ მუნკის „ყვირილი“ და ლეონარდო დავინჩის „მონა ლიზა“ სარგებლობს. ყველაზე მნიშვნელოვანი კი ის დეტალია, რომ მომხმარებლებს თავად შეუძლიათ შეუკვეთონ სასურველი ნახატი ყავაზე. ნახატებზე ვხვდებით წიგნების პერსონაჟებსაც, მათ შორის ყველაზე მეტი პატარა პრინცს ითხოვს.
ლის თქმით, ხშირად უთქვამთ, რომ ყავაზე მისი ნახატები იმდენად ლამაზია, რომ უჭირთ ყავის დალევა. თუმცა ლი დასძენს, რომ მთავარი მის ყავაში სწორედ გემოა და ის ცდილობს განსხვავებული და გემრიელი გემო დაახვედროს მომხმარებლებს, რათა მათ ორმაგი სიამოვნება მიიღონ.
ყავის ღირებულება $6 აშშ დოლარს შეადგენს. მისი შეკვეთა რამდენიმე დღით ადრე ხდება. ლი დაახლოებით, სამი დღე ანდომებს მომზადებას, უშუალოდ ყავის დამზადების პროცესი კი 1 საათს გრძელდება. სანამ ყავა მზადდება, ლის კაფეში მომხმარებლებს სხვადასხვა საინტერესო დესერტით უმასპინძლდებიან.
ლიმ ყავის დამზადება 10 წლის წინ დაიწყო, მაშინ როდესაც ის 18 წლის იყო.
“თავდაპირველად, როცა ამ საქმიანობას მოვკიდე ხელი სამხრეთ კორეაში ამგვარ ყავას იშვიათად ამზადებდნენ და ცოტა შიშმა შემიპყრო. თუმცა,როცა ვხედავდი როგორ მოსწონდა ხალხს ის, მეტი მოტივაცია მომეცა,“- ამბობს ლი, – არასდროს მიცდია პროფესიონალური ხატვა, ის მხოლოდ ჰობი იყო, ახლა კი საყვარელი საქმე და ჰობი შევუთავსე ერთმანეთს.
ლი სამხრეთ კორეაში ეპატიჟება ყველას, გეგმავს, რომ სხვადასხვა ქალაქში მასტერკლასები ჩაატაროს და აქვს სურვილი,რომ სხვა ქვეყნის მცხოვრებლებმაც დააგემოვნონ მისი ყავა.
ნათია კეკენაძე
