დღეს, გაიმართა Docrina Business Review-ს (DBR) კვლევის პრეზენტაცია თემაზე – ,,გლობალური ინოვაციები და საქართველო’’, სადაც განხილულ იქნა ორგანიზაციების – Cornell University, INSEAD და World Intellectual Property Organization (WIPO) მიერ მომზადებული კვლევის „გლობალური ინოვაციის ინდექსი 2013“ შედეგები და საქართველოს მდგომარეობა მსოფლიო ინოვაციური განვითარების რეიტინგში.
დღევანდელ შეხვედრაზე, პრობმელურ საკითხებთან დაკავშრებით თავისი მოსაზრება გამოთქვეს – არასამთავრობო სექტორის წარმომადგენელმა კობა კიკაბიძემ და სტრატეგიული განვითარების სააგენტოს თავჯდომარემ ნოდარ ძიძიკაშვილმა.
კობა კიკაბიძის თქმით, მას ავტორებთან ერთად ინოვაციურ საკითხებთან დაკავშირებით ნაშრომი აქვს გამოქვეყენებული. მან ასევე აღნიშნა, რომ ინოვაციურ საკითხების განხილვაში აქტიურად არის ჩართული.
,,დღეს გამართული პრეზენტაცია სასურველი და დროულია, რადგან ხელისუფლება სამომავლო განვითარებას დიდ მნიშვნელობას ანიჭებს’’,- განაცხადა კიკაბიძემ.
მისივე თქმით, ახლო მომავალში ქვეყნის ეკონომიკური ინკლუზიური სტრატეგიის გასაჯაროება მოხდება. აღნიშნული სტრატეგია ქვეყნის ინოვაციური განვითარებისთვის ერთ-ერთი საწინდარი იქნება.
ნოდარ ძიძიკაშილის თქმით, ახალი მთავრობის მიერ საქართველოში ინოვაციების შესახებ პრეზენტაცია გაკეთდა, თუმცა ჯერ-ჯერობით დოკუმენტის სახით არ არის ჩამოყალიბებული. კონცეფციაში განხილული საკითხები გათვლილია 2040 წლამდე.
მისივე თქმით, კარგი იქნება, თუ კონცეფციის შემუშავებაში ჩაერთვებიან არასამთავრობო ორგანიზაციები.
„მხოლოდ მთავრობა სტრატეგიას ვერ შეიმუშავებს. მაშინ იქნება შესაძლებელი ქვეყნის ეკონომიკაზე და ინოვაციებზე საუბარი, თუკი სხვა ქვეყნების მსგავსად, მთავრობა საკონსულტაციო და არასამთავრობო ორგანიზაციებთან ერთად გადაწყვეტს აღნიშნულ საკითხებს“, – აღნიშნავს ძიძიკაშვილი.
მისივე განცხადებით, გასათვალისწინებელია ისიც, რომ ჯერ კიდევ ადრეა ინოვაციური განვითარების მეთოდებზე და სტრატეგიაზე საუბარი, სანამ დოკუმენტი გარკვეული სახით არ გამოქვეყნდება.
როგორც DBR-ში განაცხადეს დღევანდელი ღონისძიების მიზანი იყო, წარმოაჩენილიყო საქართველოს ინოვაციური განვითარების შემაფერხებელი ფაქტორები, შეეთავაზებინათ საზოგადოებისთვის ვითარების კრიტიკული ანალიზი და წარმოდგენილიყო რეკომენდაციები ქვეყნის ინოვაციური განვითარების მნიშვნელოვანი გაუმჯობესებისათვის.
მათივე განმარტებით, „გლობალური ინოვაციის ინდექსი 2013“-ში სადაც განხილულია მსოფლიოს 142 ქვეყნის ინოვაციური განვითარების მახასიათებლები, საქართველო რეიტინგში 142 ქვეყნიდან 73-ე ადგილზე გავიდა, აღსანიშნავია, რომ იგი წინა წელს 71–ე პოზიციაზე იყო.
რეიტინგში საქართველოს ყველაზე ცუდი შედეგები დაუფიქსირდა შემდეგი მიმართულებით:
- მიმდინარე ხარჯები განათლებაზე
- ადამინური კაპიტალი და კვლევები
- ბაზრის კაპიტალიზაცია
- ადგილობრივი კონკურენციის ინტენსივობა
- ცოდნის გავრცელება ქვეყნის მაშტაბით და ა.შ.
გარდა ზემოთ ჩამოთვლილი მაჩვენებლებისა საქართველოს კიდევ ბევრ ინდიკატორში აღენიშნება მნიშვნელოვანი ჩავარდნა, რაც საბოლოო ჯამში უაღრესად კრიტიკული და საგულისხმო დასკვნების გამოტანის საშუალებას იძლევა, განაცხადეს კვლევის პრეზენტაციაზე ღონისძიების ორგანიზატორებმა.
18.09.13
მარინა ფიდუაშვილი
