„მე კოალიციაში ყოფნის სურვილი არ მქონდა. ჩვენ მზად ვიყავით ბრძოლა გაგვეგრძელებინა, თუმცა ივანიშვილს ჰქონდა რესურსი მოეშორებინა სააკაშვილი უსისხლოდ, მაგრამ ვერ მოიშორა“ , – ამის შესახებ ნინო ბურჯანაძემ „ტვ პირველზე“, გადაცემა „პირველების“ ეთერში ისაუბრა.
„ივანიშვილის განცხადება,რომ სასურველ ოპოზიციად მოვიაზრებოდი, იყო თამაში .ეს იყო ფარული შეთავაზება და მე არ მიმიღია შეთავაზებად. როგორც ჩანს ჭკვიანად ვერ მოვიქეცი. ივანიშვილს არ სჭირდება პარტნიორად დამოუკიდებელი პოლიტიკური ფიგურა. ზუსტად ვიცი,რომ მან ჩაატარა თათბირი არჩევნებამდე 2 დღით ადრე და გასცა განკარგულება,რომ ბურჯანაძემ ბარიერი ვერ უნდა გადალახოს.
სააკაშვილი არის კრებითი ფიგურა. მნიშვნელოვანი იყო,რომ სისტემა,რომელიც სააკაშვილმა შექმნა მოშორებულიყო. „ნაციონალური მოძრაობა“, როგორც ერის დამანგრეველი სისტემა, გამქრალიყო. თუმცა, პარლამენტში დღეს ტონს აძლევს „ნაციონალური მოძრაობა“ და ის მთავარი ოპოზიციური ძალაა.
შედგა ოპოზიციური მოლაპარაკებები,რომ ყველანი ვთანხმდებოდით საერთო ოპოზიციურ კანდიდატზე და ის აუცილებლად შექმნიდა იმ პირობებს,რომ მეორე ტურში გავიდოდა, ხელისუფლებას კი გაუჭირდებოდა მოგება. ჩვენთვის გაუგებარი მიზეზებით, უცებ „პატრიოტთა ალიანსი“ აცხადებს,რომ ირმა ინაშვილი იქნება კანდიდატი. თუ საზოგადოება ნიჰილიზმს გადალახავს და არ შეეგუება,რომ ცხოვრობს ივანიშვილის „ბუტკაში“, ჩვენ გვაქვს დიდი შანსი“ , – განაცხადა ნინო ბურჯანაძემ.
მანანა ღოღობერიძე
