თბილისის საკრებულოს ოპოზიციამ საქალაქო სასამართლოში სარჩელი შეიტანა და 29 სექტემბრის გადაწყვეტილების გაუქმება მოითხოვა. ამის შესახებ „რესპუბლიკური პარტიის“ თავმჯდომარემ, ხათუნა სამნიძემ „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„ჩვენი საჩივარი არის გაერთიანებული, ოპოზიციას ერთი პოზიცია აქვს, რომ ასეთი კანონდარღვევით გადაწყვეტილებების მიღება არ უნდა ხდებოდეს. ვითხოვთ ორივე გადაწყვეტილების გაუქმებას, ზონალური ცვლილების,რომელიც 29 სექტემბერს მოხდა და ხმაურიანი განხილვის საგანი გახდა საკრებულოს სხდომაზე, ასევე 10 ოქტომბრის გადაწყვეტილების, როდესაც ეს ტერიტორიები საკუთრებაში გადაეცა ბიძინა ივანიშვილის კუთვნილ ფირმას.
პუშკინის მიმდებარე ტერიტორიაზე 1900 კვადრატული მეტრი არის თვითმმართველობის საკუთრება, გაუსხვისებელი ქონების კატეგორიაში შედის და მისი გასხვისება შეიძლება მხოლოდ იმ შემთხვევაში, თუ მუნიციპალიტეტი დაასაბუთებს მისი ფუნქციის შეწყვეტას. ასეთი განხილვა არ მომხდარა საკრებულოში არც ერთ ეტაპზე. ესეც არის საფუძველი,რომ სასამართლომ იმსჯელოს გადაწყვეტილების გაუქმებაზე.
ვითხოვთ პროცესის შეჩერებას,რომ ინვესტორმა, მშენებარე კომპანიამ არ დაიწყოს საქმიანობა, ხეების გაჩეხვა და ა.შ. აქ გადის გზა,გუდიაშვილის ქუჩა, რომელიც არის მუნიციპალიტეტის საკუთრება. ამ გადაწყვეტილებას სჭირდება საკრებულოს შემადგენლობის 2/3-ის ხმა, საკრებულომ კი ეს განაჩენი მხოლოდ 29 ხმით გამოიტანა. ხელშეკრულებაში წერია,რომ აქ იქნება პარკინგი გათვლილი 30 მანქანაზე, სიტყვა საჯარო კი ნახსნები არ არის“ , – განაცხადა ხათუნა სამნიძემ.
მანანა ღოღობერიძე
