რამდენიმე წელია, რაც ქართულ ბაზარზე ქართული ბუნებრივი ხელნაკეთი საპნების მწარმოებელი კომპნაია გამოჩნდა. “ბაქსი ნატურალე” ქართულ ბაზარზე 2015 წელს გამოჩნდა. თავდაპირველად კომპანია მხოლოდ ხელნაკეთ საპნებს აწარმოებდა. თუმცა მოთხოვნიდან გამომდინარე, თანდათან ასორტიმენტი გაიზარდა და დღეისთვის ”ბაქსი ნატურალე” ნატურალური პროდუქციის რამდენიმე ხაზითაა წარმოდგენილი. კომპანიის დამფუძნებელი ნატა გუბელაძე „თბილისი თაიმსს“ პროდუქციის შექმნისა და სამომავლო გეგმების შესახებ ესაუბრა.
ჩვენს მკითხველს რომ მოუყვეთ, როგორ შეიქმნა „ბაქსი ნატურალე“?
– თავდაპირველად დავიწყეთ ბუნებრივი ხელნაკეთი საპნის წარმოება. მას შემდეგ რაც ჩვენი პროდუქცია დერმატოლოგებსა და სპეციალისტებს გავაცანით, მათ გვირჩიეს დაგვემზადებინა ისეთი საპნები, რომლებსაც სამკურნალო თვისებებიც ექნებოდა. აქედან გაიზარდა ჩვენი წარმოების პროცესიც, დაემატა სამკურნალო ხაზი, რომელიც სხვადასხვა სახის კანისთვის არის გათვლილი. გვაქვს საპონი მგრძნობიარე კანისთვის, არყის ხის კუპრის საპონი, რომელიც გამონაყარისა და აკნეს სამკურნალოდ გამოიყენება, გვაქვს ასევე გოგირდის საპნები. მოგვაინებით ჩამოვიტანეთ ჩაის ხის ზეთი და მისი გამოყენებით დავამზადეთ ანტიბაქტერიული საპონი, რომელსაც სხვა ქიმიური საპნებისგან განსხვავებით აქვს ბევრი ბუნებრივი დანამატი და თავისი მოქმედებით ბევრად ეფექტურია.
რა განსხვავებაა ბუნებრივ ხელნაკეთ საპნებსა და ქარხნული წარმოების საპნებს შორის?
– ხელით წარმოება არის ერთგვარი ტექნოლოგია, რომელიც პრინციპულად განსხვავდება ქარხნული წარმოებისგან. ეს ეხება არა მარტო იმას, რომ ხელით იქნება, არამედ რეცეპტურასა და ტეგნოლოგიას. ქიმიურ საპონს, შენახვის ხანგრძლივობის გასაზრდელად აცლიან ნებისმიერ დამატებით კომპონენტს: გლიცერინს, ცხიმებს და უმატებენ სპეციალურ სუნებსა და ფერებს. რაც შეეხება ბუნებრივ ხელნაკეთ საპონს, მას არანაირი დამატენიანებელი კომპონენტი არ ეცლება. საპნის წარმოების პროცესი რომ მთავრდება, მას კიდევ ემატება სხვადასხვა სახის ზეთი, რომ გახდეს მეტად ეფექტური და შეიძინოს დამატებითი მომვლელი თვისებები კანისთვის. ეს ის ძირითადი თვისებები, რომლითაც გამოირჩევა ხელნაკეთი ბუნებრივი საპონი. განსხვავდება იმითაც, რომ ბუნებრივი საპნის გამოყენებისას კანი არ ეჩვევა საპონს და არც უკუჩვენება აქვს, რადგან სრულიად ბუნებრივი ნივთიერებებისგან მზადდება.
რა სახის პროდუქციას აწარმოებს დღეს „ბაქსი ნატურალე“?
– დღეს უკვე 12 სახეობის საპნის წარმოება ხდება და თითოეული მათგანი გამოირჩევა განსხვავებული სამკურნალო თვისებებით. მათგან გამორჩეული რქაწითელისა და საფერავისგან დამზადებული საპნებია. უახლოეს მომავალში კი მომხმარებელს შევთავაზებთ რძის შრატისგან დამზადებულ საპონს. გარდა საპნებისა, გვაქვს ცხოველების მოვლის ბუნებრივი საშუალებები- საპნები, შამპუნები და პარაზიტული სპრეი, რომლებიც აბსოლუტურად ბუნებრივია და მისი ხშირი გამოყენება რეკომენდებულია. მოგვიანებით დავამატეთ წვერის მოვლის ბუნებრივი საშუალებები-წვერის დამატენიანებელი ზეთები ბუნებრივი ეთერზეთებით, წვერის ბალზამები და წვერის ცვილი.გვაქვს ასევე კოსმეტიკური საშუალებები. კანის გამწმენდებითა და კოსმეტიკური კრემებით. გვაქვს ასევე სრულიად გამორჩეული შამპუნი, რომელიც მზადდება საპნის ხის კაკლისგან და სრულიად განსაკუთრებულია.
როგორია „ბაქსი ნატურალეს“ ფასები და რამდენად ხელმისაწვდომია მომხმარებლებისთვის?
– ჩვენი პროდუქცია თავისი ფასით არის საშუალო სტატისტკური კოსმეტიკის ფასის ანალოგიური. ვცდილობთ, პროდუქციის ღირებულება იყოს ხელმისაწვდომი. მაგალითად, 100 გრამიანი საპნის ფასი არის 6-7 ლარი. კრემის ფასები იწყება 25 ლარიდან და მერყეობს 55 ლარის ფარგლებში. გვინდა, ჩვენი პროდუქცია გაიცნოს ბაზარმა და ხალხმა ირწმუნოს იმის, რომ ქართული პროდუქციაც შეიძლება იყოს ძალიან კარგი და მაღალი ხარისხის.
სად შეიძლება თქვენი პროდუქციის შეძენა?
– საპნები და წვერის მოვლის საშუალებები არის ავერსისა და „ფარმ სახლის“ აფთიაქებში, თითქმის მთელი საქართველოს მასშტაბით. რაც შეეხება სრულ ასორტიმენტს წარმოდგენილია მაღაზია ჰუალინგის- თბილისი ზღვის პლაზას პირველ სართულზე, ჩვენს მაღაზიაში.
როგორია „ბაქსი ნატურალეს“ სამომავლო გეგმები?
– სამომავლოდ გვინდა, რომ თმის მოვლის ხაზი გავაფართოვოთ და გავხადოთ უფრო ინტენსიური. შესაძლოა უახლოეს მომავალში დავამატოთ ტანის მოვლის საშუალებებიც. ვაპირებთ, მაღაზიების გახსნას სხვადასხვა ადგილას, რათა მომხმარებელს ჰქონდეს საშუალება შეიძინოს ჩვენი პროდუქცია. რამდენიმე თვის წინ იყო შემოთავაზება უცხოელი მწარმოებლებისგანაც და ვგეგმავთ პროდუქციის ამიერკავკასიაში გატანას.
მარიამ ლეკიაშვილი
