„გაუგებარი იყო პრეზიდენტის ბრიფინგის შინაარსი. ხელმოწერა იყო ტექნიკური საკითხი, მან ამას მიუძღვნა საგანგებო ბრიფინგი. ამის მიზანი იყო წინასაარჩევნო განცხადების გაკეთება“ , – ამის შესახებ პარლამენტის თავმჯდომარემ, ირაკლი კობახიძემ „ტვ პირველზე“, გადაცემა „რეაქციას“ ეთერში ისაუბრა.
„პრეზიდენტმა არაპირდაპირ მაინც აღიარა,რომ დოკუმენტი არის ხარისხიანი და მეორე მხრივ გააკეთა ცხადი პოლიტიკური განცხადება, ისაუბრა რამდენად არადემოკრატიული კონსტიტუცია მიიღო „ქართულმა ოცნებამ“ და მოუწოდა ამომრჩეველს დემოკრატიის დაცვისკენ.
ვის მოსწონს ის,რომ მარგველაშვილი მეგობრობს „ნაციონალურ მოძრაობასთან“ ხალხის გადასაწყვეტია. ეს იყო აბსოლუტურად არაადეკვატური ბრიფინგი, პრეზიდენტი შევიდა ჩიხში და ეს მდგომარეობა ღრმავდებოდა რაც უფრო მეტად წარმატებლი ხდებოდა ეს პროცესი. როცა ადამიანი ჩიხშია, ხშირად იქცევა არაადეკვატურად. ის ბოლომდე ელოდება ხოლმე ვადის გასვლას, მაგრამ ამჯერად დაასწრო არჩევნებს,რომ გაეკეთებინა პოლიტიკური განცხადება.
სოციოლოგიური კვლევებით ყველა პირობა არსებობს, რომ გარდაუვალია პირველივე ტურში მოგება. კახი კალაძის ლომის წილია,რომ პარტიამ შეძლო გაძლიერება. პოლიტიკური გადაწყვეტილებების მიღებისას, ის ყოველთვის ამოდიოდა ობიექტური ინტერესებიდან და ეს მისი პირადი თვისებაა. რაც შეეხება ბიძინა ივანიშვილს, მისი მიზანი იყო დისტანცირება პოლიტიკისგან, ეს დაპირება შეასრულა და მოქმედებს ამ განცხადების შესაბამისად. ის დღემდე არის ბუნებრივია მნიშვნელოვანი ფაქტორი ქართულ პლიტიკაში, მაგრამ დისტანცირებულია პოლიტიკური პროცესებისგან“ , – განაცხადა ირაკლი კობახიძემ.
მანანა ღოღობერიძე
